Jaıyq ózeni men saǵalarynda áýesqoı balyq aýlaýǵa shekteý qoıyldy

ATYRAÝ. QazAqparat – Jaıyq-Kaspıı oblysaralyq balyq sharýashylyǵy basseındik ınspektsııasynyń resmı ókili Oleg Týshkanovtyń aıtýynsha, balyqtardyń ýyldyryq shashatyn merzimi bastaldy, dep habarlaıdy QazAqparat tilshisi.

«Osyǵan baılanysty, 15 mamyr – 15 maýsym aralyǵynda Atyraý jáne Batys Qazaqstan oblystarynyń aýmaǵyndaǵy Jaıyq ózeninde, barlyq jaıylma sý aıdyndarynda áýesqoı balyq aýlaýǵa tolyq tyıym salý kúshine endi. Mundaǵy basty maqsat – sý aıdyndarynda balyqtardyń ósimin molaıtý. Sondyqtan, ınspektsııa mamandary 15 mamyrdan 15 maýsymǵa deıin ózen, kólderge balyq aýlaý quraldarymen barǵandarǵa aıyppul salady. Jalpy, osy kezeńde balyqtar ýyldyryq shashatyn sý aıdyndarynda motorly qaıyqtarmen jáne basqa da quraldarymen júrýge tyıym salyndy», - deıdi Oleg Týshkanov.

Onyń aıtýyna qaraǵanda, Qurmanǵazy aýdanyndaǵy Qıǵash ózeninde mundaı shekteý senbi, jeksenbi jáne mereke kúnderin qospaǵanda, 20 sáýirde bastalǵan. Onyń merzimi 20 mamyrda aıaqtalady.

«Qıǵash – Reseımen shektesetin ózindik ereksheligi bar ózen. Memlekettiń basty baǵyttarynyń qatarynda aýyldyq jerdegi kásipkerlikti, óńdeýshi kásiporyndardy damytýǵa jan-jaqty qoldaý kórsetý de bar. Sol sebepten, Qıǵash ózeninen balyq aýlaý merzimine erte shekteý qoıyldy», - dep málim etti Oleg Týshkanov.

Eske sala ketelik, budan buryn brakonerlerden 1 tonnaǵa jýyq bekire tárkilengen bolatyn.