«Jaıly mektepterde» otandyq jıhaz, asa joǵary jyldamdyqty ınternet bolady

ASTANA. QazAqparat – «Jaıly mektepter» tolyq otandyq taýar óndirýshi shyǵarǵan jıhazben, joǵary jyldamdyqty ınternetpen qamtamasyz etiledi. Bul týraly Oqý-aǵartý mınıstrligi Qarjy jáne bıýdjettik josparlaý departamentiniń dırektory Ǵalymjan Moldash aıtty, dep habarlaıdy QazAqparat tilshisi

«Qazir 217 mekteptiń qurylysy boıynsha jer ýchaskelerin bólý, qajet qujattardy ázirleý, kelisý jáne taǵy basqa uıymdastyrý is-sharalary sheshilip jatyr. Óńirlerdiń ákimdikteri qurylys obektilerin qajet ınjenerlik-kommýnıkatsııalyq ınfraqurylymmen, avtobýs marshrýttarymen jáne aıaldamalarmen qamtamasyz etedi. Ár mektepke aparatyn jol salynady. Ásirese iri, ortasha jáne shaǵyn qalalarda ár mekteptiń janynda mindetti túrde avtobýs aıaldamasy salynady.

Sonymen qatar «Jaıly mektepter» tolyq otandyq taýar óndirýshi shyǵarǵan jıhazben qamtamasyz etiledi. Odan basqa, mektepterdi salý barysynda otandyq taýar óndirýshiniń ónimderi mindetti túrde paıdalanylady. Bul ustanymdy qadaǵalaý «Atameken» UKP-men birlese júrgiziledi», - dedi ol bilim salasy qyzmetkerleriniń respýblıkalyq tamyz keńesinde.

Budan bólek, mektepter jyldamdyǵy sekýndyna 100 megabıtten joǵary ınternetpen qamtamasyz etiledi.

«Qazirgi qoldanystaǵy zańnamaǵa sáıkes, qalalarda ınternet jyldamdyǵy 25 megabıtten aspaıdy, aýyldarda - 8 megabıt. Árıne, bul óte jetkiliksiz», - dedi Ǵalymjan Moldash.

Sondaı-aq tamyz keńesi barysynda málim bolǵandaı, 2026 jylǵa deıin oqýshylar kontıngenti 4,5 mln balaǵa ósedi. Oqýshy oryndarynyń tapshylyǵy 1,1 mıllıonǵa jetýi yqtımal. Qazir Qazaqstanda 3,9 mln oqýshy bar. 7 700-ge jýyq mektep jumys istep tur.

Ǵalymjan Moldashtyń aıtýynsha, Táýelsizdik jyldary elimizde mektepter sany 1,6 myń birlikke azaıǵan.