«Jaıly mektep» jobasy: Mańǵystaý oblysynda 24 mektep salynady

AQTAÝ. QazAqparat - Prezıdenttiń «Jaıly mektep» jalpyulttyq jobasy aıasynda Mańǵystaý óńirinde 44 myń oryndyq 24 mektep salynady, dep habarlaıdy QazAqparat tilshisi.

Baǵdarlama boıynsha kelesi jyly 15 mekteptiń qurylysy bastalady.

«Prezıdent dástúrli Joldaýynda bilim máselesine erekshe kóńil bóldi. Mektep qurylysy oblys ákimderiniń jaýapkershiligine júktelgenin aıtqan bolatyn. Aımaq basshylary jyl sońyna deıin salynyp jatqan bilim ordalarynyń jeri men ınfraqurylymyna qatysty máselelerdi sheship, memleketten bólingen qarjyǵa jaýapty bolýy tıis», - dedi Mańǵystaý oblystyq Bilim basqarmasy basshysynyń orynbasary Aıjaqsy Turjanova.

Jalpyulttyq joba óńirdegi úsh aýysymda oqytý máselesin sheshpek.

Óıtkeni qazir Mańǵystaý oblysynda 15 mektep áli de úsh aýysymda jumys isteıdi. Al taǵy ekeýi – apatty jaǵdaıda. Aıta keteıik, Mańǵystaý óńiri demografııalyq kórsetkish boıynsha kósh basynda tur. Sondyqtan jańa mektepterge suranys bar.