«Jaıly mektep» jobasy boıynsha ótken tenderdiń qorytyndysy tekseriledi

ASTANA. QazAqparat – Amanat partııasynyń jemqorlyqqa qarsy is-qımyl keńesi «Samruk-Kazyna Construction» kompanııasynyń «Jaıly mektep» jobasy boıynsha ótkizgen konkýrsynyń qorytyndysyn tekseredi. Májilistiń Áleýmettik-mádenı damý komıteti ótkizgen jıynda osyndaı sheshim qabyldandy, dep habarlaıdy QazAqparat tilshisi.

Bul sheshimge bastamashy bolǵan depýtat Erlan Saırov «Jaıly mektepke» blingen qarajat monopolısterdiń talan-tarajyna túsedi dep alańdaıtynyn aıtady.

«Amanat partııasynyń jemqorlyqqa qarsy is-qımyl keńesi «Samruk-Kazyna Construction» kompanııasynyń «Jaıly mektep» jobasy boıynsha ótkizgen konkýrsynyń qorytyndysyn tekseredi. Qazir búkil qujatty aldyryp, qansha fırmanyń jeńip shyqqanyn, ol kompanııalar kimge tıesili, arasynda olıgarhııalyq top ókilderi bar ma, sony tekseremiz. Qazaqstandaǵy qurylys salasy monopolııaǵa aınalyp ketken. Oǵan monopolııa jasap otyrǵan – burynǵy memlekettiń basshysyna jaqyn fırmalar. Mine, sol fırmalar qazir áleýmettik mańyzy bar qurylys nysandaryna enip jatyr», - degen Erlan Saırov naqty mysal da keltirdi.

«Osydan 3 jyl buryn, pandemııa kezinde Almatyda BI Group úlken aýrýhana saldy. Onyń 3 mlrd teńgesi qoldy bolyp ketken. Qazir osy bólingen («Jaıly mektep» jobasyna – red.) qarjy da qoldy bolyp ketedi degen qaýip bar. BI Group qana emes, «Bazis-A» bar - osylardyń bárin tekserý kerek», - dedi depýtat.

«Samruk-Kazyna Construction» kompanııasynyń basqarma tóraǵasynyń qurylys jáne paıdalaný jónindegi orynbasary Ǵabıt Malǵazdarovtyń aıtýynsha, Erlan Saırov ataǵan BI Group kompanııasy «Jaıly mektep» jobasy aıasynda 16 mektep salatyn kelisimshart jasasqan.