Jaıly mektep jobasy: Bıyl Túrkistan oblysynda 29 mekteptiń qurylysy bastalady
Túrkistan oblysynda «Jaıly mektep» ulttyq jobasy aıasynda 49 myń oqýshyny qamtıtyn 63 mektep salynady. Onyń 29-ynyń qurylysy bıyl bastalyp, 2024 jyly aıaqtalady. Al qalǵan 34 mekteptiń qurylysy 2024 jyly bastalady. Memleket basshysy Qasym-Jomart Toqaevtyń tikeleı tapsyrmasymen salynatyn bul bilim uıalary óńirdegi úsh aýysymdy jáne apatty mektepter máselesin túbegeıli sheshýge serpin bermek.
Atalǵan aýqymdy qurylysqa baılanysty oblys ákimi Darhan Satybaldynyń tapsyrmasymen ulttyq jobany júzege asyrý jónindegi algorıtm jasaldy. Algorıtmge sáıkes oblys kóleminde arnaıy jumys toby qurylyp, quramyna oblys ákiminiń orynbasarlary, aýdandar men oblystyq mańyzy bar qalalardyń ákimderi, basqarma basshylary, depýtattar, bilim salasy jáne ınfraqurylymǵa qatysty mekeme ókilderi engizildi. Jumysshy toptyń otyrysy aıyna keminde 1 ret ótkizilip, ózekti máseleler talqylanýda. Árbir bilim uıasynyń qurylysy qatań baqylaýǵa alynady. Infraqurylymy, ınjenerlik júıeleri, jeri, sýy men gazy, elektr júıesi, jalpy árbir ózekti máselesin sheshý joldary josparlanyp, naqty jumys júrip jatyr.
Oqýshylardyń sany zerdelenip, qaýipsizdigi de basty nazarǵa alynǵan. Sonymen birge mektepterdiń jobasy, qoldanylatyn qurylys materıaldary men jıhazdary boıynsha da ortaq standart qabyldanǵan. Ol merdigerlerge usynyldy.
Júıeli ári jedel jumystar nátıjesinde 2023 jyly qurylysy josparlanǵan 29 mekteptiń 19-ynyń jer telimderi bólindi. Qurylys-montaj jumystaryn júrgizetin merdiger men jobalaýshy mekemeleri anyqtaldy. Al qalǵan 10 mektep boıynsha «Samruk-Kazyna Construction» aktsıonerlik qoǵamy tarapynan satyp alý konkýrsynyń ashylýy ótkizilýde.