«Jaıly mektep» jobasy: 100 000 muǵalim daıarlanady
12:55, 01 Qarasha 2022
ASTANA. QazAqparat – Pedagogıkalyq bilimniń tujyrymdamasyn qaıta naqtylaý júrgiziledi. Bul týraly Úkimet otyrysynda elimizdegi bilim berýdi damytýdyń 2026 jylǵa deıingi tujyrymdamasyn talqylaý kezinde QR Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat tilshisi.
«Joǵary bilim salasyndaǵy mańyzdy baǵyttardyń biri – pedagog mamandardy daıarlaýdyń sapasyn arttyrý. Osy rette pedagogıkalyq joǵary oqý oryndaryn akkredıtteýden ótkizý standarty ázirlenip jatyr. Sondaı-aq «Jaıly mektep» jobasy aıasynda 100 000 muǵalimdi daıarlaý josparlanyp otyr», - dedi S. Nurbek.
Sonymen qatar ol pedagogıkalyq bilimniń tujyrymdamasyn qaıta naqtylaý, ýnıversıtet oqytýshylaryn «Bolashaq» baǵdarlamasy arqyly taǵylymdamadan ótkizý men tsıfrlyq jáne jańa tehnologııalardy keńinen qoldaný mindetteri turǵanyn aıtty.
Aıta keteıik, búgin Úkimet otyrysynda bilim berýdi damytýdyń 2026 jylǵa deıingi tujyrymdamasynyń jobasy bekitildi.