Jaıly mektep: ulttyq joba aıasynda Almaty oblysynda 39 mektep salynady

QONAEV. QazAqparat – Almaty oblysynda oqýshylardyń úsh aýysymmen oqý máselesin shuǵyl sheshý qajet. Memleket basshysy Qasym-Jomart Toqaev óńir jurtshylyǵymen kezdesýinde jańadan 39 mektep salynatynyn aıtty, dep habarlaıdy QazAqparat Aqordaǵa silteme jasap.

«Ult bolashaǵy urpaqtyń bilimdi bolýyna baılanysty. Men bilim salasyna, onyń ishinde árbir óńirdegi mektepterdiń jaı-kúıine aıryqsha mán berip otyrmyn. Almaty oblysynda úsh aýysymmen oqytatyn mektep máselesi áli sheshimin tappaı keledi. Aımaqta osyndaı 52 mektep bar. Nebári 30 myń oqýshyǵa eseptelgen mektepterde 90 myńǵa jýyq bala oqyp jatyr. Bul máseleni shuǵyl sheshý qajet. Osy jumysqa memleket jáne jekemenshik seriktestigi arqyly bıznes ókilderin tartqan jón. Óńirde osyndaı ıgilikti iske atsalysýǵa daıyn kásipkerler bar dep oılaımyn.

Meniń tapsyrmam boıynsha «Jaıly mektep» ulttyq jobasymen oblysta 39 mektep salynady. Budan bólek, Qonaevta daryndy balalarǵa arnalǵan lıtseı jáne ınternat ashý qajet. Taǵy da qaıtalap aıtamyn. Mektep salý jáne ony jańǵyrtý – ákimderdiń jumysyndaǵy negizgi kórsetkishterdiń biri», - dedi Prezıdent.