«Jaıly mektep»: elordada 24 mektepti jobalaý bastaldy

ASTANA. QazAqparat – Elordada eki jyl ishinde 100 myń oqýshy ornyna arnalǵan mektepter salynady. Bul týraly Astana qalalyq bilim basqarmasy basshysynyń mindetin atqarýshy Narıman Elamanov málim etti, dep habarlaıdy QazAqparat tilshisi.

«Búginde elordada 164 mektep bar. Onyń ishinde 100 memlekettik, 57 jekemenshik jáne 7 respýblıkalyq mektep. Aıaqtalǵan oqý jylynda 236 myń bala bilim aldy. Bıyl birinshi synypqa 27 myńnan astam bala qabyldanady dep kútilýde. Ótken oqý jylymen salystyrǵanda oqýshylar sany 20 278 oqýshyǵa artty. Bul taǵy 10 mektep jáne 1200 muǵalimdi qajet etedi», - dedi Narıman Elamanov Astana qalasynyń kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, bıylǵy oqý jylynda 15 700 orynǵa arnalǵan 10 mektep paıdalanýǵa beriledi.

«Memleket basshysynyń tapsyrmasy boıynsha «Jaıly mektep» ulttyq jobasy aıasynda 90 myńdaı oqýshyǵa arnalǵan (2 aýysymda) 24 mektepti jobalaý bastaldy. Aldaǵy eki jylda 100 myń oqýshy ornyna arnalǵan mektepter salynady. Jalpy bilim beretin mektepterde jyl saıyn oqýshylar sany orta eseppen 20 myńǵa artyp keledi. Boljam boıynsha 2027 jyly oqýshylar sany 330 myńnan astam balany quraıdy. Osyǵan baılanysty elordada 3 487 pedagog maman qajet», - deıdi ol.