Jaıly mektep: Bıyl Qyzylorda oblysynda 10 mekteptiń qurylysy bastalady

QYZYLORDA. QazAqparat - Memleket basshysy Qasym-Jomart Toqaevtyń bastamasymen elimizde 2025 jylǵa deıin 800 myń balanyń zamanaýı mektepte bilim alýyna jaǵdaı jasaý maqsatynda «Jaıly mektep» ulttyq jobasy qolǵa alynǵan bolatyn. Oblys ákimi Nurlybek Nálibaevtyń usynysy negizinde aldaǵy 3 jylda Qyzylorda oblysynda 15100 orynǵa arnalǵan zamanaýı 21 mektep salynady dep josparlanyp otyr, dep habarlaıdy QazAqparat.

Jobanyń jalpy quny – 100 mlrd teńge.

Atap aıtqanda: Qyzylordada - 8, Aralda - 4, Qazalyda - 2, Qarmaqshyda - 2, Jalaǵashta - 1, Syrdarııada - 1, Shıelide – 1 jáne​ Jańaqorǵan aýdanynda zamanaýı 2 mektep boı kóteredi.

Oblystyq bilim basqarmasynyń basshysy joba aıasynda bıyl óńirde 10 mekteptiń qurylysy bastalatynyn aıtyp, olardyń ózge mektepterden aıyrmashylyǵyn sóz etti.

«Mamyr-maýsym aıynda 10 mekteptiń qurylysyn bastaımyz. Búginde barlyǵynyń jeri rásimdeldi. Smetalyq qujattary daıyndaldy. Jalpy ereksheligine kelsek, bastaýysh jáne joǵary synyp oqýshylary mektep ǵımaratynyń jekelegen bloktarynda oqıtyn bolady. Sáıkesinshe, olardyń óz oqý kabınetteri, ájethanalary, sportzaldary bolady. Sondaı-aq beınebaqylaý, dybystyq dabyl sııaqty qaýipsizdik nysandary ornatylady, zamanaýı fızıka, hımııa, bıologııa, robototehnıka sııaqty kabınettermen qamtamasyz etiledi. Arnaıy bilimdi qajet etetin balalar úshin qajetti jaǵdaı jasalady», - dedi Meırambek Shermaǵanbet.

Jalpy, 2023 jylǵa bilim salasyna 260 mlrd teńgege jýyq qarjy bólinip otyr.

Aldaǵy 3 jylda oblystaǵy úsh aýysymdy jáne apatty mektepterdiń jaǵdaıy tolyq sheshiledi dep kútilip otyr, aýyldyq eldi mekenderdegi mektepter jańǵyrtýdan ótedi.

Byltyr apatty dep tanylǵan 6 mekteptiń úsheýiniń máselesi sheshimin tapty, al qalǵan 3 mektep «Jaıly mektep» jobasy aıasynda salynatyn bolady.

Budan bólek, bıyl 5 mektepti paıdalanýǵa berý josparlanyp otyr. Sondaı-aq aǵymdaǵy jyly josparǵa sáıkes aýyldyq eldi mekendegi 47 mektep jańǵyrtýdan ótkizilip, 51 mektepke pándik (fızıka, hımııa, bıologııa) kabınetter alynady.

Bilim salasyndaǵy taǵy bir qýanyshty jańalyq, aımaq basshysynyń tapsyrmasyna sáıkes, bıyl 1-4 synyp oqýshylary mektepte tegin ystyq tamaqpen qamtylýda.

Bul oblys boıynsha alǵash ret júzege asyrylyp otyr.