«Jaıly mektep»: Bastaýysh pen joǵary synyp oqýshylary bólek ǵımaratta oqıdy

ASTANA. QazAqparat – «Jaıly mektep» jobasy aıasynda mektepter aýylda da, qalada da biryńǵaı standartpen salynady. Bul týraly Oqý-aǵartý mınıstrligi Qarjy jáne bıýdjettik josparlaý departamentiniń dırektory Ǵalymjan Moldash aıtty, dep habarlaıdy QazAqparat tilshisi

«Ulttyq joba aıasynda salynatyn mektepter buryn salynǵan mektepterden edeýir erekshelenedi. Atap aıtqanda, jaıly mektepter aýylda da, qalada da biryńǵaı standartpen salynyp, pándik kabınettermen jáne zerthanalarmen tolyq jabdyqtalady. 1-4 synyp oqýshylary jáne 5-11 synyp oqýshylary úshin ǵımarattar bólek bloktardan turady. Mekteptiń sport zaldary 1-4 synyp jáne 5-11 synyp oqýshylary úshin bólek ornalasady. Olar oqýshylardyń sanyna saı esepteledi. Árbir mektepte qyzdar men uldardy eńbekke baýlýǵa arnalǵan arnaıy sheberhanalar, stýdııalar qarastyrylady. Osy jáne basqa da ózgeshelikter balalarymyzdyń taǵdyry men quzyrettiligin jan-jaqty damytýǵa baǵyttalǵan», - dedi ol Bilim salasy qyzmetkerleriniń respýblıkalyq tamyz keńesinde.

Onyń atap ótýinshe, qalalarda jáne belsindi damyp kele jatqan perspektıvkasy bar eldi mekenderde jobalyq qýaty 300-den 2500-ge deıin 369 mektepti salý arqyly 740 myń jańa oqýshy ornyn qurý josparlanyp otyr.

«Oqý-aǵartý mınıstrligi «Jaıly mektep» ulttyq jobasyn iske asyrýǵa qajet barlyq normatıvtik bazany ázirlep, qoldanysqa engizdi. Bul rette mektep salý kezinde týyndaıtyn kóptegen problema ulttyq jobada eskerildi», - dedi Ǵalymjan Moldash.