Jaıly mektep: 100 myńnan astam jumys orny qurylady

ASTANA. QazAqparat – Jaıly mektepterdiń kópshiligi qandaı óńirlerde salynatyny belgili boldy. Sondaı-aq, nysandardyń qurylysyna 2,6 trln teńge qaralyp otyr, dep habarlaıdy QazAqparat tilshisi.

«Jańa mektepter eń aldymen, mektep tapshylyǵy bar aımaqtarda salynady. Bekitilgen josparǵa sáıkes, mekteptiń kópshiligi Almaty oblysy (63), Túrkistan oblysy (63), Shymkent (25), Mańǵystaý oblysy (24), Astana (24) men Almatyda (22) turǵyzylmaq. Qalǵan mektepter shaǵyn qalalardy qosa alǵanda, búkil Qazaqstan boıynsha teńdeı bólinedi. Búginde jaıly mektepter qurylysynyń naqty merzimi men oqýshy orny sany belgilendi. Máselen, Almaty oblysynda 63 jańa mektepte 136 myńǵa jýyq bala oqı alady. Elordadaǵy 25 jańa mektep 88 myń oqýshyny qabyldaı alady», - dedi «Samruk-Kazyna Construction» AQ basqarma tóraǵasy Máýlen Aımanbetov elordada ótken «Jaıly mektep» jobasyn júzege asyrýdy talqylaý barysynda.

Onyń aıtýynsha, ulttyq joba halyqty eńbekpen qamtýǵa úles qosady.

«2 jyldan keıin orta bilim berý obektilerin salý esebinen 100 myńnan astam jumys ornyn qurý múmkindigi týady», - deıdi ol.

Spıkerdiń málimdeýinshe, «Jaıly mektep» jobasynyń jalpy bıýdjeti – 2,6 trln teńge.

«Jaqyn arada mektepterdi jobalaý, salý jáne qyzmet kórsetýshilerdi anyqtaıtyn ashyq konkýrs ótkizemiz. Merdiger mektepti tolyq salyp, daıyn kúıinde tapsyrýy kerek. Baıqaý týraly habarlandyrý 20 aqpanǵa deıin ashyq resýrstarda jarııalanady», - deıdi M. Aımanbetov.

Buǵan deıin jaıly mektepterdiń ulttyq naqyshta salynatyny aıtylǵan edi.