Jaıly mektepterdiń jeke basqarý júıesi bolady

<p>ASTANA. KAZINFORM — «Jaıly mektep» ulttyq jobasy aıasynda salynǵan mektepter úshin jeke basqarý júıesi engiziledi. Bul týraly Úkimet otyrysynda Memleket basshysynyń Joldaýyn iske asyrý jónindegi jalpyulttyq is-sharalar josparynyń jobasyn tanystyrǵan Premer-Mınıstrdiń orynbasary — Ulttyq ekonomıka mınıstri Nurlan Baıbazarov aıtty.</p>

«Aqsha balaǵa» qaǵıdaty boıynsha memlekettik tapsyrys sheńberinde mektepke deıingi tárbıe men oqytýdy qarjylandyrýdyń dıfferentsıatsııalanǵan tásili modeline erekshe nazar aýdarylatyn bolady. Aldaǵy 3 jyl ishinde el boıynsha 1300 mektepti, onyń ishinde demeýshilik qarajaty esebinen qaıta jańartý josparlanýda. Sonymen qatar, «Jaıly mektep» ulttyq jobasy aıasynda salynǵan mektepter úshin jeke basqarý júıesi kózdeletin bolady», — dedi Nurlan Baıbazarov.

Mınıstrdiń aıtýynsha, áleýmettik blokta bilim berýdiń, densaýlyq saqtaýdyń jáne sporttyń sapasy men qoljetimdiligin arttyrý, onyń ishinde olardy qarjylandyrýdy reformalaý máseleleri boıynsha sharalar qabyldanady.

Osy maqsatta memlekettik-jekeshelik áriptestik tetigin, «áleýmettik ámııan» quralyn paıdalaný, bilim berý granttaryn dıfferentsıatsııalaý jáne taǵy basqalar qarastyrylady.

«Týrızm salasynda Katonqaraǵaı, Zaısan jáne Kendirli kýrorttyq aımaqtarynda qajetti ınfraqurylymmen qamtamasyz ete otyryp, aerovokzal keshenderi men áýejaılardy salý boıynsha jumystar kózdelip otyr. Ónerkásipti damytý qory arqyly shaǵyn avıatsııa áýe kemelerin satyp alý josparlanýda. Bul sharalar ishki týrızmdi damytýǵa qosymsha serpin bered», — dedi ol.