Jaıly mektepter bilim oshaǵyna asa muqtaj óńirlerde salynýy tıis – Oljas Bektenov
«Jaıly mektep» ulttyq jobasynyń elimizge kerekti, óte mańyzdy joba ekenin bárimiz jaqsy túsinemiz. Bul – Memleket basshysynyń tikeleı bastamasy. Birinshiden, joba arqyly úsh aýysymdy jáne apatty jaǵdaıdaǵy mektepter men oqýshy oryndarynyń tapshylyǵy sııaqty keshendi problemalar sheshimin tabýy tıis. Ekinshiden, salynyp jatqan mektepterdiń sany ár óńirdiń qajettiligin jáne ondaǵy demografııalyq ahýaldy eskere otyryp aıqyndalǵan», - dedi Úkimet basshysy.
Sondyqtan Premer-Mınıstr olardyń barlyǵy jańa mektepterge asa muqtaj óńirlerde salynýy qajettigin basa aıtty.
«Onyń ústine, jaıly mektepter atyna zaty saı, oqýshylarǵa yńǵaıly ári bilim berý deńgeıi joǵary bolýy tıis. Bul – Oqý-aǵartý mınıstrliginiń basty mindetteriniń biri. Atalǵan mektepterge jobalaý sátinen bastap erekshe úlgidegi ádis-tásilder qoldanylyp otyr. Sondyqtan olar qaýipsiz jáne sapaly bilim berý ortasyna aınalýy kerek. Atalǵan mektepter áý bastan tsıfrlyq kameralarmen jabdyqtalyp, polıtsııanyń Jedel basqarý ortalyqtaryna jalǵanýy tıis», - dedi ol.
Úkimet basmshysy jańa, ınteraktıvti oqytý ádisterin qoldanýǵa múmkindik beretin joǵary jyldamdyqty ınternet júrgizilýi kerektigine de nazar aýdartty. Sonymen qatar oqý protsesine qajetti zamanǵa saı jabdyqtarmen jáne jıhazdarmen qamtamasyz etilýi tıistigin basa aıtty.
«Bul mektepterdi óskeleń urpaqty, ásirese shaǵyn qalalar men aýyldarda oqýshylardy baýrap alatyn biregeı ortalyqtarǵa aınaldyrý qajet. Ákimdikterdiń nazaryn osyǵan aýdarǵym keledi. Ol úshin sport sektsııalary men shyǵarmashylyq úıirmeler ashylyp, balalarǵa qosymsha bilim alý maqsatynda fılmder kórip, ınternetten qajetti aqparat izdeý, kitaphanada daıyndalý múmkindigi berilýi tıis. Munyń barlyǵy bilim berý sapasyn, ásirese aýyldyq jerlerdegi oqytý deńgeıin arttyrýǵa yqpal etedi. Balalar qamqorlyqty jáne jaıly oqytý protsesin naqty sezinýi kerek», - dedi Oljas Bektenov.