«Jaıly mektep» ulttyq jobasyna otandyq jıhaz ben árleý materıaldary satyp alynady
Atap aıtqanda, jańa formattaǵy mektepter qurylysy kezinde barlyq jıhaz qazaqstandyq taýar óndirýshilerden satyp alynady. Sondaı-aq syrtqy qasbetterdi árleýde qoldanylatyn materıaldardyń basym bóligi otandyq óndiristiń taýarlary bolmaq.
Kásipkerlerdi qoldaýdyń qosymsha sharasy retinde uzaq merzimdi jetkizýdi josparlaýǵa jáne tıimdi sharttarmen jobany qarjylandyrýǵa múmkindik beretin aldyn ala kelisimsharttardy qoldaný qarastyrylǵan.
Aıta keteıik, Oqý-aǵartý mınıstrligi jergilikti atqarýshy organdarmen birlesip, salynyp jatqan mektepterdi jabdyqtaý úshin jıhazdar men qural-jabdyqtarǵa qajetti barlyq tehnıkalyq sharttardy anyqtaǵan. QR Úkimeti qabyldaǵan ózgeristerdi sapaly iske asyrý úshin elishilik qundylyq úlesiniń kórsetkishterine monıtorıng júrgiziledi.
Budan bólek, qoǵamdyq monıtorıng júrgizý úshin aqparattyq júıe ázirlenýde. Osylaısha, árbir turǵyn mektep qurylysynyń barysyn qoǵamdyq dashbord arqyly baqylaýǵa múmkindik alady. Osy maqsatta qazir árbir obektide beınebaqylaý kameralary ornatylyp jatyr.
Eske sala keteıik, «Jaıly mektep» ulttyq jobasy Memleket basshysy Qasym-Jomart Toqaevtyń tapsyrmasymen júzege asyrylýda. Joba aıasynda 740 myń oryndyq 369 mektep ashý josparlanǵan. Bul óz kezeginde apatty jaǵdaıdaǵy jáne úsh aýysymdy mektepter máselelerin sheshedi.
Ulttyq jobany iske asyrý úshin 2023-2025 jyldarǵa arnalǵan respýblıkalyq bıýdjette 2,4 trln teńge qarastyrylǵan. 2023 jyly 461 myń oryndyq 217 mektep qurylysyn bastap, olardy keler jyldyń sońyna deıin paıdalanýǵa berý josparlanǵan. Al 2024 jyly 279 myń oryndyq 152 mektep qurylysyn bastap, olardy 2025 jyly ashý josparlanyp otyr.