«Jaıly mektep»: Bıyl 217 mekteptiń qurylysy bastalady
«Jaıly mektep» ulttyq jobasy aıasynda bıyl 217 mekteptiń qurylysy bastalady. Búgingi tańda osy nysandardy salý úshin qajetti jer ýchaskeleri anyqtalyp, paıdalaný quqyǵymen biryńǵaı operatorǵa berildi. Merdigerlik uıymdardy anyqtaý boıynsha «Samruk-Kazyna Construction» AQ konkýrstyq rásimder ótkizdi. Sondaı-aq merdigerlermen sharttar jasaý rásimderin aıaqtaýda. Munan bólek, mektep ǵımarattary tolyqqandy jumys isteýi úshin qajetti ınjenerlik-kommýnıkatsııalyq jeliler jetkizý jáne qurylys-montaj jumystaryn kedergisiz bastaý úshin jer ýchaskelerin daıyndaý jumystary qarqyndy júrgizilip jatyr», - dedi vıtse-mınıstr «Samuryq-Qazyna» qorynyń baspasóz qyzmeti alańynda ótken baspasóz máslıhatynda.
Onyń atap ótýinshe, eskızdik jobalardy ázirleý men olardy kelisý jumystaryn júrgizý mınıstrliktiń, jergiliktik ákimdikterdiń, Bilim basqarmalarynyń qatysýymen ótkizildi.
«Jalpy, eskızdik jobalar mınıstrlik tarapynan kelisildi. Jobalyq sheshimderdi kelisý kezinde bastaýysh mektepter men orta mektepterdiń aralyǵynda bloktardyń bolýyna, pándik kabınetterdiń, ashanalar men sanıtarlyq toraptardyń ornalasýyna erekshe nazar aýdaryldy. Úlken qalalarda jurtshylyq tarapynan mektepterge kirme joldar men aıaldama máselesi jıi týyndaıdy. Sondyqtan bul máselelerdi de osy «Jaıly mektep» jobalaryn kelisý kezinde eskeretin bolamyz», - dedi Edil Ospan.