Jaıly mektep: Aqtóbede birneshe mekteptiń qurylysy toqtap tur
«Jaıly mektep» jobasy aıasynda óńirde barlyǵy 18 mektep salynady dep josparlandy. Onyń14-in bıyl qoldanysqa berý qarastyrylǵan. Qurylys jumysy oryn tapshylyǵy jıi kezdesetin Aqtóbe qalasynda basym. Alaıda qazir keıbir mektep qurylysy toqtap tur, keıbiriniń kelisimsharty buzyldy. Sonymen birge qurylys merzimin keshiktirip jatqan merdigerler de bar.
- Tapsyrys berýshi - «Samruk-Kazyna Construction» AQ-y. Sol kompanııanyń aqparatyna súıensek, 14 mekteptiń 6-y jańa oqý jylynda qoldanysqa berilýi tıis. Biraq sol alty mekteptiń úsheýi qyrkúıekte emes, birinshi toqsannan keıin qoldanysqa berilýi múmkin. Olar: Sazdy, Saryjar jáne Eset batyr – 3 turǵyn alabynda. Aqtóbe qalasy Aqjar, Baýyrlastar jáne Keleshek aýdanyndaǵy mektepter 1-qyrkúıekke úlgerýi tıis. Al ózgesiniń bári jyl sońynda beriledi dep aıtyldy. Problemaǵa keler bolsaq, keıbirinde jobasy qate. Jobalaýshylar jobany durys jasamaǵan soń saraptamadan óte almaı jatyr,- dedi Aqtóbe oblystyq qurylys, sáýlet jáne qala qurylysy basqarmasy basshysynyń orynbasary Aslan Jarasbaev.
Máselen Temir aýdany Keńqııaq aýylyndaǵy 600 oryndy mektep qurylysy qazir toqtap tur. 2023 jyly bastalǵan qurylys jumysy bıyl aıaqtalýy tıis bolatyn. Munda ázirge tek irgetasy qalanyp jatyr.
- Byltyr 17-tamyz kúni qurylys bastalǵan. Jumysshylar sany az, tehnıka az, uıymdastyrý deńgeıi tómen. Muny astanalyq «Antarium Group» JShS salyp jatyr. Biz qurylys kompanııasynyń basshysyn shaqyryp jatyrmyz. Olar jumysyn oryndamaı jatyr. Bul kompanııa tek bir emes, 4 mektep qurylysyn óz mindetine alǵan. Olar: Aqtóbe qalasy Altyn orda aýdanynda 900, Keńqııaqta 600 oryndy mektep. Sonymen birge osy kompanııanyń Shubarqudyq aýyly men Qandyaǵash qalasyndaǵy qurylysy da problemaly bolyp tur. Áli de jyl sońyna deıin bitiremiz dep ýáde berip otyr,- dedi Aslan Jarasbaev.
Onyń aıtýynsha, Aqtóbe qalasy Jańaqonys-2 aýdanynda salynyp jatqan mektepke qatysty sot otyrysy ótip, qurylys toqtap qalǵan.
– Oblys ákimdigi qurylys Aqtóbe terrıtorııasynda júrip jatqan soń kómektesedi. Jer tańdaý, ınjenerlik jeliler tartý, qurylys materıaldaryn alý kezinde de kómektemesiz. Al 2025 jyly salynatyn mektepterge qatysty aıtar bolsam, áli konkýrsy ótpedi,- dedi ol.
Aıta keteıik, «Jaıly mektep» jobasy aıasynda salynatyn 14 mektepke 9 kompanııa jaýapty. Al Shalqar aýdany Bozoı aýylyndaǵy apatty mektep máselesin sheshýi tıis joba qazir toqtap tur. Sebebi tapsyrys berýshi men merdiger arasyndaǵy kelisimshart úzildi.