Jaıylymdardyń aınalasyna or qazǵandar jaýapkershilikke tartylady - Májilis Zań qabyldady
«Jaıylymdyq jerler Qazaqstannyń 184 mln gektar aýmaǵyn alyp jatyr. Ol barlyq aýyl sharýashylyq jerleriniń 84 paıyzyn quraıdy. Jaıylymdar aýmaǵy boıynsha bizdiń elimiz álemde besinshi orynda, bul respýblıkamyzdyń mal sharýashylyǵy ónimderiniń iri óndirýshisi jáne eksporteri bolýyna úlken múmkindikter beredi. Parlament depýtattarynyń bastamashylyǵymen «Qazaqstan Respýblıkasynyń keıbir zańnamalyq aktilerine jaıylymdardy paıdalaný máseleleri boıynsha ózgerister men tolyqtyrýlar engizý týraly» Zańynyń jobasy daıyndalǵan jáne ol Jer, Orman kodeksteri men «Jaıylymdar týraly» Zańǵa ózgerister engizedi. Jumys barysynda 200-den asa usynystar tústi, 67-si qabyldandy», - dedi zań jobasyn baıandaǵan Májilis depýtaty Nurjan Áshimbetov.
Onyń atap ótýinshe, zańǵa jaıylymǵa qajetti aýyl sharýashylyǵy janýarlarynyń sanyn júkteme normasynyń 20 paıyzdan 50 paıyzǵa deıin ulǵaıtý arqyly jer paıdalanbaý faktileriniń krıterııin qataıtý qaǵıdaty engizildi. Bul rette Aýyl sharýashylyǵy mınıstrliginiń esepteýi boıynsha jaıylymdyq jerlerdiń 20 mln gektarǵa jýyǵy qaıtarylýǵa tıis.
Jaıylymdardy konkýrsyz berý normasy alynyp tastaldy. Jer kodeksiniń 36-baby mal jaıý úshin 5 jylǵa deıingi merzimge jerlerdi tikeleı berýge ruqsat etedi. Jer resýrstaryn basqarý komıtetiniń málimetteri boıynsha 2 mıllıon gektardan astam jaıylym jeke jáne zańdy tulǵalarǵa konkýrssyz berilgen. Eldi mekenniń aınalasyndaǵy aýyl turǵyndarynyń malyn jaıýǵa arnalǵan jerlerdiń mártebesin nyǵaıtý úshin kópshilik paıdalanatyn jaıylymdar degen jeke uǵym engizildi.
«Jaıylymdardy sýlandyrý jáne jaıylymdardy túbegeıli jáne olardyń betki qabatyn jaqsartý boıynsha shyǵyndardy sýbsıdııalaý arqyly fermelerge memlekettik qoldaý normalary kózdelgen. Sonymen qatar, kópshilik paıdalanatyn jaıylymdardy qalpyna keltirý jumystaryn qarjylandyrý jergilikti bıýdjetterden jáne basqa da kózderden qarastyrylyp otyr. Aýyl sharýashylyǵy kooperatsııasyn damytýdy yntalandyrý úshin jer konkýrstarǵa kooperatıvterge qosymsha upaılar berý túrindegi artyqshylyq berý usynylady. Jerdi paıdalanýshylar jaıylymdardyń aınalasyn qazý jáne or qazý jumystaryn júrgizgeni úshin jaýapkershilikke tartylady. Engizilip otyrǵan ózgerister turǵyndardyń qajettiligine qaraı jaıylymdardyń jetispeýshilik máselelerin sheshýge yqpal etedi, paıdalanylmaı jatqan telimderdi qaıtarý boıynsha jumysty kúsheıtedi. Sondaı-aq, jerdi berý jáne paıdalaný tártibi boıynsha jergilikti turǵyndardy sheshim qabyldaý úderisine tartýǵa múmkindik beredi. Osy saladaǵy sybaılas jemqorlyqty azaıtady», - dedi Májilis depýtaty.