Jaıyqtyń kóterilýine baılanysty Atyraýdaǵy balalar aýylynda kezekshilik qoıyldy
Otbasy úlgisindegi balalar aýyly Atyraý qalasynyń mańyndaǵy Talqaırań eldi mekeninde ornalasqan. Balalar aýylynyń dırektorynyń mindetin atqarýshy Qasym Muqashevtiń aıtýynsha, mundaǵy 8 otbasyda 44 bala tárbıelenedi.
«Tárbıeshiler táýlik boıy balalar aýylynda bolady. Mektep jasyndaǵy oqýshylar Besikti, Talqaırań, Geolog aýyldaryndaǵy mektepterde bilim alady. Balalar aýylynda 49 qyzmetker jumys isteıdi. Qazir balalar aýylynyń aınalasyna metrlik bóget soǵyldy. Sý basý qaýpi tóne qalsa, tárbıelenýshilerdi evakýatsııalaýǵa daıynbyz. Dabyl sómkeleri daıyndalyp, evakýatsııalaý orny belgilendi. Jaıyq ózenindegi sý deńgeıi turaqtanǵansha, táýlik boıyna jumys isteıtin arnaıy kezekshilik toby quryldy. Balalardy tasymaldaýǵa eki kólik daıyn tur», - dedi Qasym Muqashev.
Eske sala ketelik, budan buryn Jaıyq ózeninen Atyraý mańyndaǵy 5 eldi mekenge qaýip tónýi múmkin ekenin habarlaǵan bolatynbyz.