Jaıyq jaǵasyndaǵy eldi meken turǵyndaryn qaýipsiz jerge kóshirý jalǵasyp jatyr
«Óńirdegi jaǵdaı áli de kúrdeli. Mamandardyń búgin tańmen bergen málimeti boıynsha, Reseıdiń Orynbor oblysynan bastaý alǵan kólemdi sý óńirimizge 20 sáýir kúnderi keledi dep boljanýda. Tańerteńgi aqparat boıynsha, Jaıyq ózenindegi sýdyń deńgeıi 776 santımetr boldy. ıAǵnı, keshegi mólshermen salystyrǵanda 8 santımetrge artqan. Osyǵan baılanysty, Jaıyq ózenine jaqyn ornalasqan oblysymyzdyń Aqjaıyq, Bórli, Báıterek, Terekti aýdandary men Oral qalasyndaǵy qaýipti aımaqtardan turǵyndar evakýatsııalanyp jatyr», - dedi ol ortalyq kommýnıkatsııalar ótken brıfıngide.
Onyń sózinshe, tasqyn bastalǵannan beri óńirde 13 614 adam, onyń ishinde 5653 bala qaýipsiz jerge kóshirilgen. Oblystan sý basqan ýchaskelerdiń turǵyndaryna arnap 9 myńǵa jýyq adamdy qabyldaı alatyn 161 ýaqytsha panalaý pýnkti ázirlengen. Qazir sonyń 15-in 2 189 adam panalap jatyr.
«Tasqynyna qarsy is-sharalarǵa oblysymyzdan jáne basqa aımaqtardan 6 478 adam, 1 574 tehnıka jumyldyryldy. Onyń ishinde 790 arnaıy tehnıka bar.
Tótenshe jaǵdaılar mınıstrligi men Ulttyq ulan tikushaqtarynyń ekıpajy daıyn. Olar qajet bolǵan jaǵdaıda gýmanıtarlyq kómekti jetkizip, apattyq-qutqarý jumystaryn júrgizedi.
Oblysta turǵyndardyń tirshiligin qamtamasyz etetin strategııalyq nysandardy qorǵaý sharalary kúsheıtildi. Atap aıtqanda, Oralda «Batys sý arnasy» JShS, «Jaıyqjylýenergo» AQ, Elektr jelileri jáne Kógildir otynmen qamtamasyz etetin nysandar men basqa da obektilerde tasqynǵa qarsy jumystar kúsheıtildi. «Jaıyq ózeni boıyndaǵy strategııalyq nysandardy sý tasqynynan qorǵaý úshin bógetterdi nyǵaıtý boıynsha jumystar júrgizilip jatyr. Sondaı-aq, bul kásiporyndar qazir qalypty rejımde jumys istep tur. Qala turǵyndaryn sýmen qamtamasyz etý jumystary aldyn ala qolǵa alynǵan», - dedi Erhan Tatken.