Jaıyq ózeniniń deńgeıi Taıpaq aýyly tusynda qaýipti shekten asyp ketti

<p>ORAL. KAZINFORM — Jaıyq ózenindegi sý deńgeıi Aqjaıyq aýdany Taıpaq aýyly tusynda qaýipti shekten (850 sm) asyp ketti.</p>

«Qazgıdromet» RMK BQO fılıalynan málim etkenindeı, 4 mamyr kúngi saǵat 08.00-degi aqparatqa sáıkes ózen deńgeıi bir táýlikte 52 santımetrge kóterilip, 857 santımetrge jetti.

Jaıyq ózeniniń Batys Qazaqstandaǵy basqa gıdrobeketterinde sý deńgeıi túsip jatyr. 

Oǵan qosa Báıterek aýdanyndaǵy Kóshim kanalynda 779 santımetrdi (-34, qaýipti shegi — 800 sm) kórsetti.

Aqjaıyq aýdanynyń ákimi Murat Serdalınniń aıtýynsha, Taıpaq aýyly bıikte ornalasqandyqtan, qaýip joq.

«Taıpaq aýyly tusynda kún saıyn sý deńgeıi 50 santımetrge joǵarylaǵanymen, jaǵdaı qalypty. Sondaı-aq Bazarsholan, Almaly, Sarytoǵaı aýyly mańyndaǵy jaıylmalarǵa da sý shyǵyp, Atyraýǵa qaraı aǵyp ketip jatyr» dedi M.Serdalın.

«Jaıyqtehservıs» MKK dırektory Tımýr Myrzaǵalıev ózen boıynda ornalasqan sý uńǵymalaryn sý basýyna baılanysty aýyldyq okrýgterge aýyz sýdyń tasymaldanyp berilip jatqanyn jetkizdi. 

Eske sala keteıik, budan buryn BQO-da Jaıyq deńgeıi Taıpaq gıdrobeketinde 8 metrden asqanyn jazǵan bolatynbyz.

Batys Qazaqstanda sý tasqynynan egis dalasy da zııan shekti.