Jaıyq ózeniniń deńgeıi Inder men Mahambette tómendep, Atyraýda kóterilgen joq

<p>ATYRAÝ. KAZINFORM &ndash; Jaıyq ózeniniń deńgeıi Inder men Mahambet aýdanynda tómendep, Atyraý qalasynyń tusynda kóterilgen joq.</p>

Atyraý oblystyq jedel shtabtyń málimetine qaraǵanda, birneshe kúnnen beri Jaıyq ózenindegi sý deńgeıi Inder men Mahambet aýdanynda tómendeý kórsetkishi tirkelip otyr. 

Máselen, búgin, 1 maýsymda Inderbor kentinde -7 santımetrge azaıǵan. Tańerteńgi saǵat 08:00-de munda 941 sm bolǵan. Biraq, áli de qaýipti shekten 91 santımetrge kóp bolyp tur.

Al, Mahambet aýdanynda da Jaıyqtyń sýy tómendep keledi. Bul aýdanda búgin tańerteń ózen arnasy kóterilmedi. Keshe keshki saǵat 20:00-degi kórsetkish ózgergen joq. Bul – 10 metr 14 santımetr. Degenmen, qaýipti shekten 164 santımetrge kóp. 

Jaıyq ózeniniń sýy Atyraý qalasynyń tusynda turaqtaǵan sekildi. Munda 28 mamyrdan beri kóterilgen joq. Sol kúni Jaıyqtyń deńgeıi munaıly shaharda 6 metrge jetken edi. Búgin tórtinshi kún qatarynan osy deńgeı saqtalyp tur. Munda qaýipti shek 550 santımetr deńgeıinde belgilengen. Osy turǵydan aıtsaq, shahar tusyndaǵy sý deńgeıi jarty metrge ulǵaıǵan. 

Búgin Jaıyq ózeniniń sýy Atyraý qalasynyń mańyndaǵy Jańatalap aýylynda 431, al, Erkinqala eldi mekeninde 388 sm qurady. Eki aýylda da sý arnasy kóterilmegen. 

Eske sala ketelik, budan buryn Atyraýdyń tusynda Jaıyq ózeniniń sýy ekinshi kún qatarynan kóterilmegenin jazǵan bolatynbyz.