Jaıyq ózenindegi sýdyń kóterilýi 94 eldi mekenge qaýip tóndiredi – Nurlan Baıbazarov

<p>ORAL. KAZINFORM &mdash; Jaıyq ózenindegi sý deńgeıiniń kóterilýi Oral qalasymen qosa, 94 eldi mekenge qaýip tóndiredi. Batys Qazaqstan oblysynda sý tasqyny bastalǵannan beri 3700-ge jýyq turǵyn evakýatsııalyq ortalyqtarǵa ornalastyryldy. Sonyń 2700-ge jýyǵy úıine oraldy. Bul týraly QR Premer-mınıstriniń orynbasary Nurlan Baıbazarov BQO-daǵy sý tasqynyna qatysty ahýal boıynsha jasaǵan úndeýinde málim etti.</p>

Premer-mınıstr orynbasarynyń aıtýynsha, qalǵan myńnan astam adam 13 evakýatsııalyq pýnktte. Olar azyq-túlikpen, qajetti medıtsınalyq kómekpen qamtamasyz etildi. Qajet bolǵan jaǵdaıda óńirde 30 myńnan astam orynǵa evakýatsııalyq pýnktter daıyndaldy.

«Oblys turǵyndaryna keltirilgen materıaldyq shyǵyndy esepteý jumystary bastaldy. 581 turǵyn úıdiń 236-syna tehnıkalyq tekserý júrgizildi. Bul jumys jalǵasady. Sý tasqynynan zardap shekken 481 otbasyna 89 mln teńgege bir rettik tólemder jasaldy. Aldaǵy ýaqytta tólemder jalǵasatyn bolady», - dedi N.Baıbazarov.

Úkimet basshysynyń orynbasary qazirgi ýaqytta eń mańyzdy másele – sý tasqynynyń ekinshi kezeńi ekenin atap kórsetti. Aldyńǵy kúni Reseı Federatsııasynyń Irıkla sý qoımasynan sekýndyna 2 170 tekshe metr sý jiberilip jatsa, keshe 1 670 tekshe metrge tústi.

«Soǵan qaramastan, jaǵdaı kúrdeli. Oral qalasy boıynsha Jaıyq ózenindegi sý deńgeıi 7 metrge deıin kóterildi. Bul Oral qalasyna ǵana emes, ózen boıynda ornalasqan Aqjaıyq, Bórli, Báıterek, Terekti aýdandarynyń 94 eldi mekenine qaýip tóndiredi. Oblysta sý tasqyny zardaptaryn azaıtý úshin qajetti resýrstar jumyldyryldy. Oral qalasyndaǵy Jaıyq ózeni jaǵalaýyndaǵy eń qaýipti alty ýchaskede uzyndyǵy 5 shaqyrym bolatyn bógetter salynyp jatyr. Basqa da aýdandarda qaýipsizdik sharalary atqarylýda. Jalpy sý tasqyny boıynsha ahýal jedel shtabtyń baqylaýynda», - dedi N.Baıbazarov.

Eske sala keteıik, budan buryn Oralda Jaıyq jaǵasyndaǵy bógetterdi bıiktetý jumystary júrgizilip jatqanyn jazǵan bolatynbyz.