Jaıyq ózenindegi sý deńgeıi tómendep jatyr

<p>ORAL. KAZINFORM - BQO-da sý tasqynynyń aldyn alý jáne avarııalyq-qutqarý jumystary áli de jalǵasyp jatyr. Qazir Jaıyq ózenindegi sý deńgeıi túsip kele jatyr. Kórsetkish &ndash; 8 m 50 sm. ıAǵnı sý qaýipti deńgeıine deıin tústi.</p>

Oblysta halyqty evakýatsııalaý, qulaqtandyrý, bógetterdi nyǵaıtý jumystary jalǵasyp jatyr. Sońǵy táýlikte 12 adam evakýatsııalandy. Sý tasqyny kezeńinde jalpy oblys boıynsha 14 001 adam evakýatsııalandy. Onyń 5786-sy - bala. 12 evakýatsııalyq pýnkte 2 447 adam ornalasqan. BQO TJD resmı ókili Nurjan Tóleýish OKQ brıfınginde osylaı dep málimdedi.

«Jergilikti masshtabtaǵy 6 tótenshe jaǵdaı jumys istep jatyr. Jedel shtab pen kúndelikti monıtorıng pen kezekshilik júrgizilip jatyr. 1 mln tekshe metrden astam qar sýy soryldy. 1,3 mln dana qapshyq tóseldi. 26 617 tonna ınertti materıal tóseldi. Bul jumystarǵa 3114 adam, 993 tehnıka, 71 sý sorý quraly, 170 júzý quraly men 1 áýe kemesi jumyldyryldy», - dedi spıker.

Qosymsha kúsh-quraldardyń jartysy Atyraý óńirine jiberildi. Oblys boıynsha jaǵdaı turaqty jáne qatań baqylaýda.