Jaıyq ózenindegi sý deńgeıi Oral qalasy gıdrobeketinde 710 santımetrge jetti

<p>ORAL. KAZINFORM &mdash; Jaıyq ózenindegi sý deńgeıi Oral qalasy tusynda bir táýlikte 7 santımetrge kóterildi.&nbsp;</p>

«Qazgıdromet» RMK BQO fılıalynyń dırektory Tilegen Shapanovtyń 9 sáýir kúngi saǵat 08.00-degi málimeti boıynsha oblys ortalyǵynda sý deńgeıi 710 santımetrge (qaýipti shegi – 850 sm) jetip otyr.

Jaıyq ózeniniń Báıterek aýdany ıAnvartsev gıdrobeketindegi deńgeıi 4 santımetrge (773 sm, qaýipti deńgeıi – 1 250 sm) tómendese, Kóshimde (+2, 653 sm – 850 sm), Taıpaqta (+30, 373 sm – 850 sm) kóterilýi baıqalady.

Sondaı-aq, Kóshim kanalyndaǵy sý deńgeıi bir táýlikte 40 santımetrge (792 sm) joǵarylap, qaýipti deńgeıge (800 sm) jaqyndady.

Esesine Shaǵan ózeni Chývashın tusynda 50 santımetrge (1 224 sm) tústi.

BQO ákiminiń orynbasary Qalııar Aıtmuhambetov basty nazar Jaıyq ózeni boıynda ornalasqan Oral qalasy men tórt aýdanǵa aýdarylyp otyrǵanyn jetkizdi.

«Qazirgi kezde barlyq kúsh oblys ortalyǵy men Báıterek, Bórli, Aqjaıyq jáne Terekti aýdandaryna jumsalýda. Oral qalasynda bógetterdi nyqtaý jumystary bir-eki kúnde bitpekshi. Báıterek pen Bórlide qarqyn jaqsy. Aqjaıyq pen Terekti aýdandarynda da sharalar atqarylyp jatyr», - dedi Q.Aıtmuhambetov.

«Jaǵdaı ázirge qalypty. Biraq erteńnen bastap Jaıyqtaǵy sý deńgeıi óse beredi. Sharyqtaý shegi 15-16 sáýirde dep otyrmyz», - dedi Oral qalasynyń ákimi Mırjan Satqanov.

Eske sala keteıik, budan buryn Oral qalasynlaǵy saıajaılardan turǵyndar kóshirilip jatqanyn jazǵan bolatynbyz.