Jaıyq ózenindegi sý deńgeıi Inder men Mahambet aýdanynda teńesti

<p>ATYRAÝ. KAZINFORM — Búgin Jaıyq ózenindegi sý Inder aýdanynda tómendep, Mahambet aýdanynyń aýmaǵynda kóterildi. Qazir eki aýdanda sý arnasynyń deńgeıi birdeı bolyp tur.</p>

Atyraý oblysynyń jedel shtaby taratqan aqparatqa qaraǵanda, búgin kúndizgi saǵat 12:00–de Jaıyq ózenindegi sýdyń deńgeıi Inder jáne Mahambet aýdanynda 1015 santımetrdi kórsetip tur. 

«Búgin, 20 mamyrda tańerteńgi saǵat 08:00–den beri Jaıyq ózeni Inder aýdanynda -6 santımetrge tómendedi. Al, Mahambet aýdanynda +4 santımetrge kóbeıdi. Qazir eki aýdanda da ózen sýy 1015 santımetrdi kórsetip tur»,-dep habarlady oblystyq jedel shtabtan. 

Jaıyq ózeni Inder aýdanynda sońǵy ret 14 mamyrda +3 santımetrge kóterilgen edi.

Sol kúni Inderbor kenti tusynda ózen sýynyń deńgeıi 1041 santımetrge jetti. 

Inder aýdanynda Jaıyq ózeniniń tómendeýi 15 mamyrda bastalǵan. Sodan beri Inderborda ózen arnasy kún saıyn tómendep keledi.

Máselen, 18 mamyrda -6 santımetrge azaıǵan. Keshe 19 mamyrda da sý deńgeıi -5 santımetrge tústi. 

Biraq Mahambet aýdanynda sý deńgeıiniń kóterilý kórsetkishi tirkelip otyr.

Bul aýdanda 14 mamyrda Jaıyq deńgeıi +14 santımetrge ulǵaıyp, 980 santımetr bolǵan. 

Al, 15 jáne 18 mamyrda +8 santımetrge kóbeıgeni tirkelgen. Jaıyq ózeniniń sýy búgin Mahambet aýdanynda qaýipti shekten 165 santımetrge asyp tur.

Eske sala ketelik, buǵan deıin Atyraý-Oral trassasynyń Mahambet aýdanyndaǵy 44-shaqyrymy jyrylǵanyn jazǵan bolatynbyz. 

Keıin Atyraý-Oral trassasynyń 71-shaqyrymynda jol ústimen sý ótti.

Al, búgin túnde Mahambet aýylyna qaýip tóndi.