Jaıyq ózenindegi sý deńgeıi Inder aýdanynda 10 metrden tómen tústi
Atyraý oblysy jedel shtabynyń málimetinshe, búgin, 24 mamyrda ózen arnasyndaǵy sý Inder aýdanynyń ortalyǵy – Inderbor kentiniń tusynda - 5 santımetrge azaıǵan. Qazir bul aýdandaǵy sý deńgeıi 9 metr 95 sm qurady. Bul – tańerteńgi saǵat 08:00-degi málimet.
Jaıyq ózeniniń sýy Mahambet aýdanynda áli de 10 metrden joǵary deńgeı saqtalyp otyr. Bul aýdanda keshe, 23 mamyrdaǵy saǵat 20:00-de 1020 sm bolǵan edi. Búgin tańerteń ózen arnasy kóterilmeı, osy deńgeıi saqtalyp tur.
Al, Atyraý qalasynda sý arnasynyń deńgeıi búgin +5 santımetrge ulǵaıdy. Munaıly shaharda Jaıyqtyń sýy qaýipti shekten 40 sm asyp, 590 sm bolyp tur.
Ózen arnasymen aǵyp kelgen sýdyń deńgeıi qala mańyndaǵy Jańatalap aýylynda 426, Erkinqala eldi mekeninde 348 sm quraǵan. Eki eldi mekenniń tusynda +2 santımetrge kóbeıgen.
Eske sala ketelik, budan buryn Jaıyq sýy tasyp, Atyraý-Oral jolynyń 80-85-shaqyrym aralyǵy jabylýy múmkin ekenin habarlaǵan edik.