ASTANA. KAZINFORM — Maldıv araldarynyń astanasy Male qalasynda voleıboldan ótip jatqan Ortalyq Azııa chempıondar lıgasynda Oraldyń «Jaıyǵy» kezekti kezdesýin «Help SC» (Nepal) komandasymen ótkizdi.
Osyǵan deıin 9 upaımen kósh bastap kele jatqan Vıktor Kozıktiń shákirtteri bul matchty jaqsy bastap, 2:0 esebimen alda turdy.
Alaıda budan keıin nepaldyq voleıbolshylar kúsh alyp ketti. Sóıtip tartysty oıyn 3:2 esebimen nepaldyq klýbtyń paıdasyna sheshildi.
19 shilde kúni «Help SC» klýby qyrǵyzstandyq «Bishkek» komandasyna 2:3 esebimen ese jibergen edi.
«Jaıyq» klýby 22 shildede «Bishkekpen» alańǵa shyǵady. Osy oıyn batysqazaqstandyqtar úshin asa mańyzdy bolǵaly tur.
Eske sala keteıik, budan buryn «Jaıyq» klýbynyń Ortalyq Azııa chempıonatynda qatarynan úsh kezdesýde jeńiske jetkenin jazǵan edik.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).