Jaıaý júrginshiler jolaǵymen júrgen velosıpedshiler qansha aıyppul tóleıdi

ÓSKEMEN. QazAqparat – Shyǵys Qazaqstan oblysynyń polıtseıleri velosıped jolaǵy bar kóshelerde jaıaý júrginshiler jolymen júrgen velosıpedshilerge eskertý jasap jatyr, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, tártip saqshylary profılaktıkalyq maqsatta qala kóshelerin aralap, velosıpedshilerge túsindirý jumystaryn júrgizip jatyr. Óskemendegi Ertis jaǵalaýynda ornalasqan Uly Otan soǵysy memorıaly aýmaǵynda velosıped jolaǵy bolsa da keıbireýler jaıaý júrginshilerge arnalǵan jolmen júrip kele jatqan. Olarǵa aýyzsha eskertý jasaldy.

«Osylaısha velosıpedshiler sol jerdegi jaıaý júrginshiler men demalýshylarǵa qolaısyzdyq týǵyzdy. Olar QR Jol qozǵalysy erejeleriniń 24.2 tarmaǵyna sáıkes tek velosıped jolaǵymen júrýi tıis. Tártip buzýshylar Ákimshilik quqyq buzýshylyq týraly kodekstiń 620-baby boıynsha ákimshilik jaýapkershilikke tartylady. Bul bapqa sáıkes 10 350 teńge mólsherinde aıyppul qarastyrylǵan», - delingen aqparatta.