Jaýyngerler arasynda qatygezdik pen álimjettikke jol bermeýimiz kerek – Memleket basshysy

ASTANA. QazAqparat –Memleket basshysy Qasym-Jomart Toqaev Búkilarmııalyq keńestiń otyrysynda jaýyngerler arasynda qatygezdik pen álimjettikke jol bermeý kerektigin basa aıtty, dep habarlaıdy QazAqparat tilshisi.

«Sarbazdarymyz qaısar, batyl, sondaı-aq bilimdi bolýy shart. Jaýyngerlerdiń boıyna otanshyldyq, adamgershilik, izgilik qasıetterdi sińirýimiz kerek. Olar naǵyz azamat degen atqa laıyq bolýy qajet. Bir sózben aıtsaq, armııa – bul rýhanı tárbıe ortalyǵy», - dedi Prezıdent.

Qasym-Jomart Toqaev bul iste aǵa býynnyń tájirıbesin paıdalaný mańyzdy ekenin atady.

«Biz qatygezdik, álimjettik sııaqty qoǵamǵa qaýipti úrdisterge jol bermeýimiz kerek. Búgin osy jerde ardaqty ardagerlerimiz otyr. Olardyń tájirıbesi, kórgen-túıgeni mol. Biz ardagerlerge zor qurmet kórsetemiz. Aǵa býynnyń tájirıbesin jas sarbazdardy tárbıeleý isine tıimdi paıdalanǵan jón», - dedi Memleket basshysy.

Osyǵan deıin Prezıdent armııanyń egemendigimizdi qorǵaýǵa árdaıym daıyn bolý qajettigin aıtty.