Jaýynger-ınternatsıonalıst Radjan Batyrqanov «Nurmaǵambetov Saǵadat Kojahmetuly» estelik medalimen marapattaldy
2021 jyldyń 23 qarashasynda Semeı qalasynda «Generaldar keńesi» Respýblıkalyq qoǵamdyq birlestigi tájik-aýǵan shekarasyndaǵy qarýly lańkestermen qaqtyǵysta batyrlyq kórsetkeni úshin, ómirin sarp etip, qyzmettesterin qutqarǵany úshin jaýynger-ınternatsıonalıst Radjan Batyrqanovty «Qazaqstan Respýblıkasynyń tuńǵysh qorǵanys mınıstri, Halyq Qaharmany, Keńes Odaǵynyń Batyry, armııa generaly – Nurmaǵambetov Saǵadat Kojahmetuly» estelik medalimen qaza tapqannan keıin marapattady.
Sonymen birge, uıym atynan qaza bolǵan batyr januıasyna 1 mıllıon teńge kóleminde materıaldy qoldaý kórsetildi.
«Perzentińizdiń erlik isi batyrlyqtyń aıqyn mysaly bolyp tabylady. Ol tek bizdiń elimizde ǵana emes, shet elderde de moıyndalǵan. Radjan marapattalyp otyrǵan estelik medal - Qazaqstan Respýblıkasynyń tuńǵysh qorǵanys mınıstri Saǵadat Nurmaǵambetov qurmetine atalǵan. Ol kisi de osyndaı jasta Keńes Odaǵynyń Batyry atandy», - dedi RQB prezıdıýmynyń tóraǵasy Mahmut Telegýsov batyrdyń anasyna estelik medaldi tabystaı otyryp.
Oblystyq Ofıtserler úıinde ótken saltanatty sharada ofıtserler, soldattar jáne jas áskerge shaqyrýshylarǵa Radjan Batyrqanovtyń erlik isi erekshe áser etti. Іs-sharany qorytyndylaı otyryp, general-maıor Telegýsov «Ádildik Joly» RQB alǵys bildirdi. Uıym osyǵan deıin qol qoıylǵan memorandýmǵa negizdelip, saltanatty basqosýdyń uıymdastyrylýy jáne ótkizilýine qoldaý kórsetti.