Jaýapty kezeńdegi jaýapty mindetter aıqyndaldy
Jabal Erǵalıev, jazýshy-dramatýrg, Qazaqstannyń eńbek sińirgen qaıratkeri, Senatorlar keńesiniń múshesi:
- Dúnıege ózgeris kerek edi. Adam balasy sol ózgeris qajettiligin aıtyp júrse de, sol dúnıe ózgerisine óziniń onsha yntaly bolmaǵany da anyq. Sol ózgeristi jasaýǵa koronovırýs pandemııasy eriksiz májúbirlegendeı boldy. Qazaqstan Respýblıkasynyń Prezıdenti Qasym-Jomart Toqaevtyń Qazaqstan halqyna arnaǵan Joldaýynda aıtylǵan tyń oılar men naqtyly sheshimder osyndaı tujyrym jasaýǵa áser etti.
Іndettiń qanshalyqty zardapty bolǵandyǵyn aıta kelip, Prezıdent «eń bastysy – biz azamattardan eshnárseni jasyrmaı, indetten qaıtys bolǵandar týraly aqparattyń barlyǵyn ashyq jarııaladyq. Qanshalyqty aşy bolsa da, shyndyqty aıtyp otyrmyz. Bul – keıbir memleketterge qaraǵanda Qazaqstannyń utymdy tusy», - dep málimdedi. Taǵy bir anyǵy, osy indet kezinde Memleket tarapynan halyqqa naqtyly qoldaý bolǵandyǵyn aıtqan lázim. Áleýmettik kómek te kórsetildi. «Elimizde jer-jahanǵa zor qaýip tóndirgen pandemııaǵa qarsy kúres áli de jalǵasýda. Biz azamattardyń ómirin jáne densaýlyǵyn qorǵaý úshin bar kúsh-jigerimizdi biriktirdik.Osyndaı syn saǵatta yntymaǵy jarasqan halqymyz judyryqtaı jumyldy», - deı kelip Qasym-Jomart Toqaev daǵdarysqa qarsy jedel sharalardyń eki toptamasy qabyldanyp, ýaqytsha tabyssyz qalǵan 4,5 mıllıonnan astam azamattarǵa 42 myń 500 teńge mólsherinde kómek berilgendigin, buǵan 450 mıllıard teńgeden astam qarajat jumsalǵandyǵyn alǵa tarty. Jáne de Prezıdenttiń aıtýynsha «Osyndaı járdem kórshiles elderde, tipti, basqa iri memleketterde berilgen joq» eken. Bul Qazaqstannyń óz halqy aldyndaǵy áleýmettik jaýapkershilikti árdaıym joǵary qoıyp kele jatqandyǵynyń jarqyn bir kórinisi deý kerek.
Bir atap óterligi sol, Qasym-Jomart Toqaevtyń Qazaqstan Halqyna arnap otyrǵan bul ekinshi Joldaýy bolsa, osy jolǵy qujatta elimizdiń álemdik daǵdarys jaǵdaıyndaǵy alda turǵan mindetterdi naqtyly atap kórsetilýi Qazaqstannyń bolashaǵyna degen senimdi nyǵaıta tústi. Іndettiń etek alýy bar, odan qaldy shaǵyn jáne orta bıznes salasynyń shekteýli jumystary halyqtyń tabysyn azaıtty. Jumystary toqtap qalǵanna keıin kóptegen sala kúrdeli jaǵdaılarǵa kezikti. Mine, osy jaǵdaıdan, ıaǵnı osy tyǵyryqtan elimiz qalaı shyǵar eken degen oı árqaısymyzdy mazalaıtyn.
Sol oı túkpirinde jatqan beımaza jaılarǵa jaryq bir sáýle túskendeı boldy da, el bolashaǵynyń kemel ekendigine senim nyǵaıa tústi. Sol senimdi Qasym-Jomart Toqaevtyń «Jerimiz sheteldikterge satylmaıdy!» dep Joldaýynda halqynyń aldynda anyq málimdegen sátte taǵy da aıqyn sezingendeı boldyq.
Jer máselesi biraz jyldardan beri túrli saıası oıyndardyń oshaǵyna aınalǵany da jasyryn emes. Endi mine, qazaq jeri ózimdiki dep sol jerge barynsha janashyrlyqpen jáne meılinshe jaýapkershilikpen qaraıtyn kez keldi. «Aýyl sharýashylyǵyn damytpaı, básekege qabiletti ekonomıka qurý múmkin emes. Bul salada sheshimin tappaı kele jatqan ózekti máseleler bar. Atap aıtqanda, jurttyń jerge qol jetkize almaýy, uzaq merzimge beriletin «arzan nesıeniń» bolmaýy, kásibı mamandardyń tapshylyǵy. Ónimdilikti arttyryp, shıkizat óndirýmen ǵana shektelmeý úshin, sondaı-aq qoıma jáne kólik ınfraqurylymyn damytý maqsatynda shuǵyl sharalar qabyldaý kerek», - deı kelip Qasym-Jomart Toqaev óz Joldaýynda elimizde et, jemis-jıdek, kókónis, qant, bıdaı, maıly daqyldar, sút ónimderin óndirý jáne óńdeý úshin 7 iri ekojúıe qalyptastyrýǵa bolatyndyǵyn jarııa etti. Rasynda da, Qazaqstannyń jer jaǵdaıynda osy ónimderge degen ishki suranysty tolyq qamtamasyz etip qana qoımaı shet eldik rynokqqa da batyl qadam jasaýǵa bolar edi. Endigi másele osy isti uıymdastyrýda qalyp otyr.
Osyǵan oraı Prezıdenttiń vertıkaldi kooperatsııa aıasynda jeke qosalqy sharýashylyqtyń áleýetin paıdalaný jáne jeke sharýashylyq mıllıondaǵan aýyl turǵyndaryna tabys tabýǵa múmkindik bere alatyndyǵyn eskerip, olardy óńirlik azyq-túlik habtaryn qurýǵa jumyldyrý kerek degen oıyn júzege asyrýdyń zor mańyzy bar dep sanaımyz.
«Biz gorızontaldi kooperatsııanyń áleýetin de esten shyǵarmaýymyz qajet. Onsyz agroónerkásip kesheninde qarqyndy damý bolmaıdy,-dep Memleket basshysy basy birikpegen jeke qosalqy sharýashylyqtar, shyn máninde, ólmestiń kúnin kórip otyrǵandyǵyn ashyq aıtty.
Áli de bolsa, aýyl eńbekkerleriniń aýyr da beınetti jumystary tym arzan baǵalanyp júrgendigin jáne osy saladaǵy tabystyń basym bóligine alypsatarlar kenelip jatatyndyǵy elimizde rynoktyq ekonomıka bastalǵaly aıtylyp kele jatqany anyq. Bul másele de Joldaýda aıtylmaı qalǵan joq. Jáne de Prezıdent Joldaýynda «Sondyqtan, sýbsıdııa jáne salyq jeńildikterin berý baǵdarlamalary aıasynda aýyldyq jerlerdegi kooperatsııany yntalandyrý úshin tıisti sharalar toptamasyn ázirleý qajet»,-deı kelip, endigi arada AGROÓNERKÁSІP KEShENІN DAMYTÝDYŃ 5 JYLDYQ JOBASYN ÁZІRLEÝ jónindegi tapsyrmasy óte oryndy usynys boldy. Endigi arada agroónerkásip salasy naqtyly bir josparmen damıtyndaı bolsa, osy salaǵa bólinip jatqan qarjy men túrli resýrstardyń jumsalýyn qatań baqylaý múmkindigi týary da anyq.
Elimizdiń baqytty ári jarqyn keleshegi ár azamattyń qajyrly qyzmetine baılanysty bolatyndyǵyn Prezıdentimiz óz Joldaýynda anyq ta ashyq aıtty. Bul el bolashaǵy úshin árqaısymyzdyń jaýapty ekendigimizdi uǵyndyrady. Osy arada bıylǵy jyldyń 25 maýsymynda respýblıkalyq «Ana tili» gazetine bergen suhbatynda Qasym-Jomart Toqaevtyń «Elimizdi órkendetý, kórkeıtý-tek qana óz qolymyzda. Bizdiń osyndaı syndarly sátte qatelesýge esh quqymyz joq. Jáne memleket qurýshy ult retinde bul máseleni birinshi kezekte ózimiz tereń sezinýimiz qajet. Óıtkeni qazaq halqynyń taǵdyry tarıh tarazysynda tur» dep aıtqany oıǵa eriksiz oralatyny bar.
Jalǵyz qazaq halqynyń ǵana emes, jalpy adamzattyń taǵdyry tarıh tarazysynda turǵan osy bir ólira tusta Qazaqstan Prezıdenti Qasym-Jomart Toqaevtyń elimizdiń áleýmettik-ekonomıkalyq jáne saıası qurylymyna keıbir ózgerister engizý jónindegi naqtyly usynystary kóńilden shyqty. Ásirese, memlekettik apparatty yqshamdaý qajettiligi burynnan týyndaǵan másele bolatyn. Bul oraıda Mınıstrlikterdegi jaýapty hatshylar ınstıtýtyna Prezıdent arnaıy toqtalyp ótti. Jaýapty hatshylyq ınstıtýtyn engizgen kezde mınıstrlerdi ákimshilik-kadrlyq jumystan bosatý jáne apparattyń turaqtylyǵyn qamtamasyz etedi degen oı is júzinde ózin aqtamady. Prezıdenttiń Mınıstrlikterdegi jaýapty hatshylardy, memlekettik qyzmetkerlerdiń sanyn qysqartý jónindegi usynysy oryndy deý kerek. «Kvazımemlekettik sektorda ákimshilik-basqarý jumysymen aınalysatyn qyzmetkerlerdiń sanyn, paıdasyz shyǵyndardy jáne basy artyq enshiles kompanııalardy qysqartý jumystary jalǵasyn tabýǵa tıis», - deı kelip Qasym-Jomart Toqaev «Báıterek» jáne «QazAgro» holdıngileriniń róline arnaıy toqtalyp, portfeldi kompanııalardyń sanyn 2 esege azaıtyp, shtat sany da 50 paıyzǵa qysqarýǵa tıisti ekendigin málimdeýi keıde negizsiz ulǵaıtyla berer shyǵyndardy qysqartýǵa jańa múmkindik týǵyzary anyq. Biz endigi arada az kúshpen, shyǵyndy az jumsaı otyryp, mol qaıtarym beretindeı jumys tártibin berik ornyqtyrýǵa mindettimiz.
Qazaqstandyq qoǵamdy taǵy da bir alańdatyp júrgen máseleniń biri - sybaılas jemqorlyq bolsa, Qasym-Jomart Toqaev osy bir máselege qatysty óz ustanymyn buryn da aıtqan bolatyn. Endi mine, sol jaıly osy Joldaýynda da óziniń ustanymyn aıqyn bildirip otyr. Joldaýda sybaılas jemqorlyqpen kúres barynsha júıeli sıpat alyp otyrǵandyǵy jáne jemqorlyqtyń paıda bolý sebepterine kóbirek nazar aýdarylyp, aldyn alý jumystary júrgizilip jaıqandyǵyn atap kórsetildi. Bul oraıda Prezıdenttiń «Sondaı-aq, sybaılas jemqorlyqqa qarsy kúrestiń jańa tásilderin engizgen jón dep sanaımyn. 2021 jyldan bastap memlekettik qyzmetshilerdiń, depýtattardyń, sýdıalardyń shetel bankterinde esepshotqa ıe bolýy, qolma-qol aqsha jáne baǵaly zattar saqtaýyna qatysty jemqorlyqpen kúres aıasynda jańa shekteýler engizý kerek», - dep málimdeýi birazdan beri qoǵamda aıtylyp kele jatqan ózekti másele edi. Jáne de para alyp qolǵa túskenderdiń ádil jaza alatyndyǵyna qoǵam shek te keltire bastaǵany bar. Áıteýir, ne aıyp tólep, ne raqymshylyq jasalyp jazadan qutylyp ketý sııaqty jaǵdaılar bolyp kelse, Prezıdent Qasym-Jomart Toqaev óz Joldaýynda «Quqyq qorǵaý organdary qyzmetkerleriniń, sýdıalardyń, para berýshilerdiń jáne paraqorlyqqa deldal bolǵandardyń sybaılas jemqorlyǵy úshin jazany qataıtý turǵysynan Qylmystyq kodekske ózgerister engizý kerek. Sybaılas jemqorlyqqa qatysty qylmys jasaǵandarǵa shartty túrde merziminen buryn bosatý sharasy qoldanylmaıdy. Jemqorlyqpen ustalǵandardyń memlekettik qyzmette jáne kvazımemlekettik sektorda jumys isteýine ómir boıy tyıym salatyn qaǵıda qatań saqtalýy kerek», - degen kesimdi sózin aıtty.
Qazaqstan Prezıdenti Qasym-Jomart Toqaev óz Joldaýynda ulttyń jańa bolmysy jaıly oryndy sóz qozǵap otyr. «Qazirgi mindet – halqymyzdyń jańa bolmysyn qalyptastyrý, tutas ult sapasyn arttyrý. Adamdy jáne qoǵamdy ýaqyt talabyna saı jetildirý qajettigin ómirdiń ózi kórsetip otyr»,-dep ulttyń jańa bolmysy na úshin qajettiligin anyqtap berdi. «Jańarǵan ult qana jańǵyrǵan eldiń jetistigin jahan jurtyna tanyta alady. Men halqymyzdyń álem úlgi tutarlyq jaqsy qasıetteriniń kóbirek bolǵanyn qalaımyn»,-degen Prezıdent sózinde ultymyzdy jańa sapaǵa kóterý úshin bizdiń kúndelikti ómirlik ustanymdarymyz da ózgerýi kerek degen oı tastaıdy. Osy oraıda Qasym-Jomart Toqaevtyń ult ustazy Ahmet Baıtursynulynyń «Bilimdi bolýǵa oqý kerek. Baı bolýǵa kásip kerek. Kúshti bolýǵa birlik kerek. Osy kerekterdiń jolynda jumys isteý kerek» degen ólmes qaǵıdasyn alǵa tartýy da tegin emes edi. Óıtkeni osy kúni barshamyzǵa el taǵdyry qymbat!
Abdolla DASTANOV, «Shyndyq» qoǵamdyq birlestiginiń tóraǵasy
- Prezıdent Joldaýy jarııalandy. Shyny kerek, «Joldaýda ne aıtady eken?» degen qyzyǵýshylyq zor boldy. Telearnalardan tikeleı efırde beriletini aldyn ala habarlanǵan soń, kórsetilgen ýaqytta kóksandyqtyń aldynan tabyldyq. Eń birinshi Májilis Tóraǵasy N.Nyǵmatýlınniń sessııany oryssha qosarlamaı júrgizgeni unady. Árıne, bul bir sóz aıtsa boldy sony orysshaǵa aýdarmalap turatyn kóptegen sheneýnik baýyrlarymyzǵa jaqsy sabaq, oń jol bolýǵa tıisti. Bul reti kelip qalǵasyn aıtylyp jatqan sóz ǵoı. Negizgi sóz Joldaý týraly.
Prezıdent Joldaýy jóninde bizden buryn pikir aıtýshylardyń arasynda «eshteńe de aıtylmady», «sol baıaǵy qurǵaq sóz» taǵysyn taǵy degen tárizdi baǵalaýlar da joq emes. Árıne, árkimniń óziniń kútken sózi bolǵany daýsyz. Sol sóz estilmese boldy, basqasynyń bárin joqqa shyǵaryp tastaý - bizde burynnan qalyptasqan «dástúr». Sondyqtan, álgindeı pikirlerge de esh tańqalýǵa bolmaıdy.
Prezıdent bir Joldaýynda memlekettegi, qoǵamdaǵy barlyq qordalanǵan máselelerdiń túıinin tarqatatýy múmkin be? Eń aldymen osy suraqty ózimizge qoıyp, sosyn oǵan baıyppen jaýap izdep kórsek qaıtedi?
Al, meniń túsinigimde, Prezıdent Joldaýynda aıtylǵanynyń ózi az bolǵan joq. Mysaly, Prezıdent bıyl jyl sońyna sheıin memlekettik qyzmetkerler sany 10%-ke, 2021 jyly 15%-ke qysqartylatynyn málimdedi. Bul týraly qoǵamda buryn aıtylmady ma? Aıtylǵanda qandaı?! «Halqynyń sany bizden áldeqaıda kóp anaý elde, mynaý elde sheneýnikter bizden áldeqaıda az» degen salystyrmaly kestege sheıin jarııalanyp júrdi ǵoı. Prezıdent memlekettik qyzmetkerler sanyn qysqartýǵa baǵyt ustansa, tapsyrma berse, bul ol kisiniń qoǵamdyq pikirge qulaq túrgeni me, joq pa?
Prezıdent tipti, qoǵam tarapynan naqty atap kórsetile qoımaǵan, biraq, eshqandaı tıimdiligi baıqalmaǵan mınıstrlikterdegi «Jaýapty hatshy» degen laýazymdy qysqartý týraly da tapsyrma berdi. Bul Prezıdenttiń siz ben biz baıqaı bermeıtindi de biletindigin baıqatpaı ma? «QazAgro» men «Báıterektiń» biriktirilip, bulardaǵy qyzmetkerlerdiń 50%-ke qysqarýy týraly tapsyrmany da osy turǵydan qarastyrǵanymyz durys.
Nemese, qazir ekiniń biri jalaýlatyp júrgen Jer máselesine kelgende de, Prezıdent qoǵam kútken sózdi nyǵarlap turyp jetkizdi. «Jer sheteldikterge satylmaıdy». «Biraq, aýylsharýashylyǵy jerlerin ekonomıkalyq aınalymǵa túsirýdiń sharalaryn qarastyrý» týraly Úkimetke berilgen tapsyrmany ne ózderi teris túsinip qalyp, nemese ádeıi burmalaý maqsatynda bolsyn, «Prezıdent Jerdi sheteldikterge jalǵa berýge bolatyndyǵyn astarlap jetkizdi, jalǵa berýdiń satýdan esh aıyrmasy joq» dep qaraspandy tóndirip jatqandar da barshylyq.
Birinshiden, Prezıdent Jer kodeksiniń keıbir baptaryna engizilgen moratorııdiń 2021 jyly merzimi bitetindigin eske aldy. Demek, sol baptar Parlamentte qaıta qaralatyn bolady. Sol kezde Úkimettiń qandaı usynys engizetini áli belgisiz. Kúteıik. Kóreıik. Aýylsharýshylyǵy jerlerin ekonomıkalyq aınalymǵa túsirýdiń sharalaryn qarastyrý týraly tapsyrma jerdi sheteldikterge jalǵa berý arqyly ǵana sheshile me? Prezıdent Úkimetke «jerdi tıimdi paıdalanýdyń joldaryn qarastyrý kerek» dep otyr, al, biz ony «bul -jerdi sheteldikterge jalǵa berýge berilgen tapsyrma» dep túsinetinimiz qalaı? 2016 jylǵy halyq tolqýyna sebep bolǵan baptardy qaıtadan «tiriltetindeı» Úkimettiń basy ekeý emes shyǵar?! Qazir jerdi sheteldikter túgili ózimizge jalǵa berýdiń de joldaryn shıratý týraly jıi aıtyla bastady. Bos baıbalamǵa salyna bergenshe, Jerdi óz azamattarymyzǵa qalaı jalǵa berýdiń tıimdi bolatyny jónindegi usynystarymyzdy ortaǵa salǵanymyz abzal-aý.
Shaǵyn jáne orta bızneske qoldaý, salyq júktemesin qaıta qaraý, muǵalimderdiń, dárigerlerdiń jalaqysyn kóterý, t.b. máseleler qoǵamda burq -sarq qaınap jatqan taqyryptar emes pe edi? Al, «Ańsaǵan sábı» baǵdarlamasy osy Joldaýdaǵy eldi eleń etkizer sóz boldy dep oılaımyn. Prezıdenttiń sózin sol qalpynda keltireıin: «Prognozy OON v otnoshenıı rosta naselenııa Kazahstana v sravnenıı s nashımı sosedıamı po Tsentralnoı Azıı neýteshıtelnye. Porýchaıý Pravıtelstvý zapýstıt s 2021 goda spetsıalnýıý programmý «Ańsaǵan sábı». Nado ývelıchıt kolıchestvo kvot po programmam EKO do 7 tysıach, to est v 7 raz». Durys pa? Durysty durys deıik. Qanshama ata-ana kvotanyń azdyǵynan EKO múmkindigin paıdalana almaı júrgendigin Saltanat Baıqoshqarova hanym suhbattarynda únemi aıtyp júrýshi edi. Bala - eldiń erteńgi órkeni. Urpaq súıý - árkimniń armany.
Qasym-Jomart Kemeluly bılik pen buqaranyń baılanysyn nyǵaıtý baǵytyndaǵy óziniń negizgi ustanymdaryn halyqqa byltyrǵy Joldaýynda jetkizgen bolatyn. Bıylǵy Joldaýda sol oılardyń odan ári keńeıtile kórinis tapqany baıqalady. Aıtalyq, el azamattaryna onlaın-petıtsııa arqyly ózekti taqyryptardy kóterýge múmkindik berilýi, máslıhattar otyrystarynyń onlaın kórsetilýin uıymdastyrý týraly meniń bilýimshe, buryn - sońdy aıtylǵan emes. Demek, keı rette Prezıdent óziniń qoǵamnan da ozyq turǵanyn kórsetti. Joldaý Prezıdenttiń eldegi jaǵdaıdy, qoǵamnyń kóńil -kúıin óte tereń biletindigimen erekshelenedi dese de bolǵandaı. «Bir kósheni jylda jańalap jóndeý berýden» bastap «sybaılas jemqorlyqqa salynǵandar men pedofılderge jazany qataıtý» týraly sózderi tamyrdy tap basqandaı boldy ǵoı. «Olarǵa eshqandaı raqymshylyq, merziminen buryn bosatý» degender bolmasyn« dedi. Endi zańǵa sondaı ózgerister engiziledi. Qoǵamdyq pikir osyny talap etetin edi. Mundaıdy qazaq «kókten tilegeniń jerden tabyldy« deıtin bolsa kerek. Sol sııaqty qos azamattyq alyp, eki eldiń arasynda saırandap júrgen serkeler de endi ne anda, ne munda bolatyn shyǵar. Sondaı -aq, memlekettik qyzmetkerler, depýtattar, sýdıalardyń sheteldegi qarjysy, dúnıe -múlki baqylaýǵa alynatyny týraly sózdiń ózi-aq talaı shıqannyń aýzyn jaryp jibergen joq pa eken?
Bul Joldaýda saıası reformalar jalǵasyn tabatyny da aıtylyp, sonyń bir dáleli retinde, aýyl ákimderin saılaýdy jolǵa qoıý týraly berilgen tapsyrma kóp uzamaı iske asatyny esh kúmán týdyrmaıdy. Baıaǵyda tatar moldalary «qazir pýshkasy kılsa, keıin Pýshkıni kıla« deıdi eken . Sol aıtqandaı, aýyl ákimderinen soń kezek qala, aýdan basshylaryna kelmeıdi deısiz be? Keledi. «Demokratııanyń basty jaýy bilimsizdik pen popýlızm» dedi Prezıdent. «Haıpokratııaǵa jol bermeı eldi satylap reformalaımyz» degendi de aıtty. Durys ustanym.
Sóz basynda aıtqanymyzdaı, eldegi qordalanǵan máselelerdiń bárin bir Joldaýǵa syıǵyzý múmkin de emes, solaı isteý mindet te emes. Prezıdent Joldaýynda bári aıtylmasa da , aıtylǵanynyń ózi az emes. Al, biz óz sózimizde sonyń tek keıbirine ǵana toqtalyp, pikirimizdi bildirdik.
Mahat Sadyq, QR eńbek sińirgen qaıratkeri
- Memleket Basshysy Qasym-Jomart Toqaev «Jańa jaǵdaıdaǵy Qazaqstan: is-qımyl kezeńi» degen Joldaýynda: «aýyl ákimderiniń saılaý arqyly qyzmetke kelýine qatysty suranystyń artqanyn kórsetip otyr. Bul mańyzdy qadamdy jan-jaqty oılastyryp, dáıekti túrde júzege asyrǵan jón... Kelesi jyly birqatar aýyldyq okrýg ákimderiniń ókilettik merzimi aıaqtalady. Aýyl ákimderiniń tikeleı saılaýyn ótkizýge bolady dep oılaımyn», - dedi.
Eńbek Eri, Olımpıada chempıony Jaqsylyq aǵa Úshkempirov: «Bes myń jigit bolsa, kúlli qazaq aýyldaryn dúrkiretip kóterýge bolady», - degenin bilemiz.
Sol qazaqtyń naǵyz Batyr azamatynyń armany Prezıdent Joldaýynda aıtylyp, oryndalatyn boldy. Pandemııamen kúres naǵyz soǵys kezindeı boldy. Mine, osy kezde Jaqsylyq aǵanyń inileri, batys kórgen, qalalarda qyzmettegi azamattardy týǵan aýyldarynyń turǵyndary Ákim bolýǵa shaqyrdy, ótinip surady. Bıyl men biletin, qyzmet estigen biraz myqty jigitter qaladan - qyrǵa attanbaqqa nıet qylǵan. Biraq másele sheshilmedi. Aýylǵa Ákim bolyp barý úshin oǵan aýdan, oblys Ákimderiniń kelisimi kerek eken. Endi bar túıtkil sheshildi.
Aýylǵa attanaıyq, arda azamattar! Gúldense aýylymyz – gúldenemiz bárimiz!