Jaýapkershilikti Prezıdentke ıtere bermeı, bárimiz teń bólisýimiz kerek – Janarbek Áshimjan
«Ótken aptada jarııalanǵan depýtattyq saýalymyzǵa baılanysty búgin Bas prokýror, Іshki ister mınıstri, Sybaılas jemqorlyqqa qarsy is-qımyl agenttiginiń tóraǵasy, basqa da kúsh qurylymynyń basshylary baıandama jasady. Depýtattardyń tarapynan kóptegen suraqtar qoıyldy. Ashyǵyn aıtqan kezde barlyq baıandamashylardan góri quqyq qorǵaýshylar Abzal Quspan men Aıman Omarovanyń baıandamasynda kóp nárse aıtylǵandaı kórindi. Osy saýaldy joldaǵan depýtat retinde aıtsam, kúsh qurylymdary basshylarynyń baıandamalarynda keltirilgen derekter kóńilimnen tolyq shyqqan joq. Qoǵam tarapynan qoıylǵan suraqtarǵa tolyq jaýap berildi dep aıta almaımyn. Biraq sol kúsh qurylymynyń basshylary, memlekettik organnyń jetekshileri qazirgi kúni tergeý amaldary júrip jatqanyn, soǵan baılanysty kóp másele qupııa jaǵdaıda júrip jatqanyn eskertti. «Sol sebepti kóp jaǵdaıdy ázirge qoǵamǵa ashyq aıta almaımyz. Tergeý amaldary tolyq bitken soń barlyq jaǵdaıdy halyqqa tıisti deńgeıde jetkizemiz» dedi. Osy taraptan alǵan kezde men jaýaptarǵa jartylaı qanaǵattandym dep aıtýǵa bolady», - deıdi depýtat.
Onyń paıymynsha, memlekettik organdar basshylarynyń baıandamalarynda keltirilgen derek-dáıekterdiń birazy osy kúnge deıin de aıtylǵan.
«Sol kúnderi qansha ǵımaratqa qansha adam shabýyl jasady, qansha adam qaıtys boldy, áskerı adamdardan qansha adam zardap shekti, bıznes nysandary qalaı qırady degen sekildi suraqtarǵa BAQ-ta shetpushpaqtap biraz málimet shyqqan. Sol málimetter jańartylypty, tolyqtyrylǵan derekter tyńdadyq dep aıtýǵa bolady. Al qoǵam tarapynan «Bul oqıǵany kimder uıymdastyrdy, krımınaldyq toptardyń jetekshileri kimder, olarǵa yqpal etip otyrǵan laýazymdy tulǵalar kimder» degen sııaqty saıası mándegi suraqtar kóp qoıylyp jatyr. Solarǵa jaýap molyraq berilmedi. Aldaǵy ýaqytta osyǵan tolyq jaýap alamyz ǵoı dep oılaımyn», - dedi Májilis ókili.
Sondaı-aq, ol qańtar oqıǵasynan durys qorytyndy shyǵarylýyna búkil Qazaqstan qoǵamy múddeli ekenin eske saldy.
«Eń negizgisi, 4,5,6,7,8 qańtar kúnderi birinshi bolyp, Memleket basshysy retinde Qasym-Jomart Toqaev úlken jaýapkershilikti moınyna aldy. Arada eki aıdan artyq ýaqyt ótti. Jaýapkershilik Prezıdenttiń ǵana moınynda bolmaýy kerek. Tıisti salalyq Úkimet músheleriniń de, óńirdegi ákimderdiń de, jalpy kúsh qurylymy basshylarynyń, sol salada qyzmet etetin tıisti laýazymdy tulǵalardyń da jaýapkershiligi bolýǵa tıis. Sol sebepti bári óz salasy boıynsha, ashyq, qanyq jáne naqty aqparat berýi kerek. Resmı aqparat almaǵan jerde áleýmettik jelide túrli alypqashpa áńgimeler týyndaıdy. Ol halyqtyń kóńil kúıine de túrli áser etedi. Sondyqtan jaýapkershilikti tek Prezıdentke ıtere bermeı, bárimiz, qoǵam da, bılik te, Parlament te, Úkimet te jaýapkershilikti teń bólisip, halyqqa naqty, shynaıy aqparatty qalaıda jetkizýimiz kerek», - dedi Janarbek Áshimjan.