Jataqhanada qalýǵa májbúr stýdentter bólmesinen shyqpaýy kerek – Ashat Aımaǵambetov

NUR-SULTAN. QazAqparat - Bilim jáne ǵylym mınıstri Ashat Aımaǵambetov koronavırýstyń taralýyna jol bermeý úshin JOO men kolledjderdiń jataqhanalaryndaǵy stýdentter úılerine qaıtarylyp jatqanyn málim etti, dep habarlaıdy QazAqparat tilshisi.

«Kolledjder men JOO-lar týraly da aqparat berdik. Olar qashyqtan oqý formatyna kóshti. Bizde JOO-lar boıynsha jalpy problema joq. Daıyn júıeleri bar. Kolledjderdiń basym bóligi boıynsha da bizde problema joq. Keıbir kolledjde osyndaı suraqtar týyndaǵan. Sondyqtan keıbir kolledjde qashyqtan oqytý júıesin tezirek ornatyp, júıege tıisti aqparat engizý máselesin pysyqtap jatyrmyz», - dedi Ashat Aımaǵambetov OKQ-da ótken baspasóz máslıhatynda.

Mınıstr jataqhanalar máselesi týraly da sóz qozǵady. Onyń aıtýynsha jataqhanalardy bosatyńdar dep, stýdentterdiń bárin qýatyndaı jaǵdaı bolmaıdy.

«Bıletterin alyp, úılerine qaıtý degendeı máseleler bar. Sondyqtan biz JOO, kolledjderdiń basshylaryna tıisti tapsyrma berdik. Eger qalaı bolsa da jataqhanada qalýym kerek, basqa baratyn jerim joq degen stýdentter jataqhanada ary qaraı qalýyna múmkindik bar. Biraq sol jataqhanada eshqandaı sharalar ótpeıdi. Árqaısysy óz bólmesinde bolyp, aralaspaı, osyndaı rejimde ómir súrýi kerek», - dedi ol.