Jataqhana salǵandarǵa memlekettik qoldaý kórsetiledi – mınıstrlik

ASTANA. QazAqparat – Jataqhanadan oryn jetpegen stýdentterge páter jaldaýǵa sýbsıdııa berilmeıdi. Bul týraly QR Ǵylym jáne joǵary bilim mınıstrligi Joǵary jáne joǵary oqý ornynan keıingi bilim komıteti tóraǵasynyń orynbasary Aqerke Abylaıhan aıtty, dep habarlaıdy QazAqparat tilshisi.

Ortalyq kommýnıkatsııalar qyzmetinde tilshiler jataqhanaǵa ornalasýdyń ornyna páter jaldaýǵa sýbsıdııa berile me degen suraq qoıdy. Mınıstrliktiń ókili Aqerke Abylaıhan mundaı jospar joq. dep jaýap berdi.

«Shynynda da, stýdentter qazir jataqhanalarǵa ornalasyp jatyr. Ýnıversıtetter qonaqúıler men jataqhana ıelerimen kelisimshart jasasýda. Mundaǵy birinshi talap – jataqhanalarda tek stýdent jastar turýy kerek. Bul jataqhanalarda turý quny 30-60 myń teńge aralyǵynda. Árıne, arzan emes. Biraq páter jaldaýǵa qaraǵanda qolaıly», - dedi Aqerke Abylaıhan.

Sondaı-aq, mınıstrlik ókili memleket ǵımaratty salý jáne qaıta qurý boıynsha bıznes ókilderin qoldaý sharalary qolǵa alynǵanyn jetkizdi.

«Olarǵa shynymen de memlekettik qoldaý qarastyrylǵan. Óńirlerde jataqhana salý kezinde 6 jyl boıy árbir bala úshin 150 AEK (517 myń teńge) mólsherinde memlekettik tapsyrys óteletin bolady. Almatyda bul soma 230 AEK-ti (793 myń teńge) quraıdy. Jataqhana ǵımaratyn qaıta jańartýǵa da qoldaý qarastyrylǵan: óńirlerde – 47 AEK (162150 teńge), Almaty, Astana qalalary úshin – 92 AEK (317400 teńge)», - dep tolyqtyrdy ol.

Buǵan deıin Aqerke Abylaıhan aqyly túrde oqıtyn stýdentterdiń jataqhanadan oryn alýǵa tolyq quqyly ekenin aıtqan edi.