Jat aǵymnan bas tartqan aqtóbelik kelinshek týraly fılm túsirildi

AQTÓBE. QazAqparat - Aqtóbedegi «Ańsar» aqparattyq ortalyǵy úsh ret kúıeýge shyǵyp, úsh ret talaq aıtylǵan kelinshek týraly arnaıy beınejazba ázirledi, dep habarlaıdy QazAqparat tilshisi.  

Aqtóbe oblystyq din ister basqarmasy men «Ańsar» aqparattyq-taldaý ortalyǵy dinde shekten shyǵyp, asyra siltegen qyzdyń áńgimesin jaryqqa shyǵardy. Beınejazbada aqtóbelik kelinshek kúıeýge shyǵyp, din jolyna túskenin aıtyp berdi.

«Qyz bala radıkaldy baǵytty ustanady. Bul beıneónimdi «Ańsar» taldaý ortalyǵy óz kúshimen túsirdi. Qysqa metrajdy, eki bólimnen turady. 16 jasynda jat aǵymda júrgen er adammen neke qıǵan. Birneshe jyl ótken soń ol jigit talaq etip, qyzdy tastap ketedi. Sodan keıin qyz túrmede otyrǵan er adammen sóılesip, telefon arqyly neke qıǵan. Bul eshqandaı sharıǵatqa saı emes. Birneshe jyldan soń ajyrasyp, úshinshi ret taǵy jat aǵym jeteginde júrgen adammen nekelesedi. Dám-tuzy jaraspaı, taǵy ajyrasqan. Qyz 6 jyldaǵy ómirin baıandaıdy. Teologtarmen tildesip, óziniń qate basqanyn túsindi. Úsh ret ajyrasqan kelinshek qalada turady, qalypty ómirge aralasyp, jumys istep júr», - dedi «Ańsar» aqparattyq taldaý ortalyǵynyń dıırektory Jansáýlet Súleımenov.

Aıta keteıik, beınejazba kezinde aqtóbelik kelinshek kúıeýge shyqqan kúnnen bastap, kúni búgingige deıingi ómiri týraly baıandady. Ol namaz oqý, jat aǵymdy nasıhattaıtyn kitaptar men beınematerıaldardyń taralýy, óziniń turaqsyz, qorqynyshty ómirin ózgege úlgi bolsyn degen nıetpen jetkizdi.

«Qazir ata-anammen qarym-qatynasym jaqsy. Ol kisilerden áli de keshirim suraımyn. Olar maǵan áli de renjýli. Olarǵa aıtpaǵan sózin, isim qalmady. Ómirdiń aýyr kezeńin ótkerdim, áli de ókinemin. Sebebi, ákem men anam kelip, jylaǵan kezde «sender kápirsińder» dep ketip qalǵan edim»,- dedi aqtóbelik adasqan kelinshek óz sózinde.

«Ańsar» aqparattyq taldaý ortalyǵynyń málimetinshe, jyl basynan beri jat aǵymda júrgen 200-ge jýyq adamnyń kózqarasy ózgergen. Olar qalypty ómirge keldi. Buǵan deıin habarlaǵanymyzdaı, oblys ákimi Berdibek Saparbaev jat aǵym jeteginde júrgendermen kúres nátıjeli bolýy úshin salafızmge zańdy túrde tyıym salý kerek dep usynys aıtqan bolatyn. Sonymen qatar, olardyń qarjylandyrý kózin taýyp, joıý týraly da aıtty.