Jat aǵymdaǵylardyń basty quraly - áleýmettik jeli

ALMATY. QazAqparat - Almatydaǵy týrızm jáne qonaqjaılyq ındýstrııa kolledjiniń stýdentterine dintanýshy Elnar Berikbaev dáris oqydy, dep habarlaıdy QazAqparat tilshisi.

Dintanýshy Elnar Berikbaev kolledj stýdentterine ekstremızm men terrorızmnen keletin qaýipti túsindirdi. Onyń aıtýynsha, olar jastardy radıkaldandyrý úshin kóbine áleýmettik jelini paıdalanady. Ásirese dinı saýaty joq, jumyssyz jastardy eliktirip, qataryna tartady.

«Jat aǵymǵa erýshilerdiń dinı senimi men ustanymdary bizdiń qoǵam men memleketke qarsy agressııalyq sıpatta ekeni belgili. Al adam balasynyń boıynda qalyptasqan kózqarastyq agressııa túbinde is-qımylǵa aınalýy ábden múmkin. Buǵan elimizidiń birneshe aımaǵynda oryn alǵan terrorlyq oqıǵalar dálel»,- deıdi Elnar Berikbaev.

Dáriskerdiń aıtýynsha, ǵalamtorda jarııalanǵan beınematerıaldardan qylmyskerlerdiń jetkilikti deńgeıde daıyndyǵy joq jastar ekeni kórinedi. Tipti qarýdy qalaı ustaýdy durys meńgermegen. Biraq olar dinı agressııalyq turǵydan qajetti deńgeıde qan tógýge, tipti ólýge daıyn. Bulardyń arasynda dinı saýaty tereń tulǵalar joqtyń qasy.

«Sáláfılik aǵymnyń erýshileri ǵana emes, ýaǵyzshylarynyń ózi joǵary deńgeıde dinı saýatty emes. Sebebi, qajet kezinde búldirgish retinde paıdalanatyn taraptarǵa olardyń dinı saýatynyń joǵary bolǵany asa qajet emes. Olar arnaıy pátýamen (nusqaýmen) ǵana basqara alady»,- deıdi dintanýshy.

Elnar Berikbaev stýdentterge terrorıst pen qylmyskerdiń aıyrmashylyǵyn aıtyp berdi.

«Terrorızmniń kózdegeni - saıasat pen qarjy. Bul top memleket ishine óz turǵyndary arqyly iritki salady. Bir-birine aıdap salý arqyly halyq arasynda úreı týǵyzady. Olar kóbine quqyq qorǵaý organdaryna shabýyl jasaıdy. Beıkúná balalardy óltirýge deıin barady. Tipti ózin-ózi jaryp jiberedi. Al qylmysker ne isteıdi? Ol jasaǵan qylmysyn jasyrýǵa jáne qashýǵa tyrysady. Terrorlyq uıym qylmys jasaǵanyn moıyndaıdy. ıAǵnı kópshilikke eshkimnen qoryqpaıtynyn dáleldegisi keledi »,- deıdi dárisker.

Dáris sońynda Elnar Berikbaev jastarǵa din jaıynda birneshe saýal qoıyp, ashyq dıalogqa shaqyrdy. Stýdentter mamanǵa bar bilgenin aıtyp berdi.

Aıta keteıik, megopolıs jastaryna Almaty qalalyq qoǵamdyq damý basqarmasynyń uıymdastyrýmen teolog, dintanýshy, psıholog, sarapshy mamandar ekstremızm jáne terrorızm taqyrybynda dárister ótkizip júr.