Jat aǵymdaǵylar memlekettik rámizderdi moıyndamaıdy - teolog
Jat aǵymdaǵylardyń teris pıǵylyn, dinı ekstremızm men terrorızimniń qaýpin jastarǵa túsindirý - búgingi kúnniń talaby. Zaıyrly memlekettiń bolashaǵy osy jastardyń qolynda. Osy maqsatta Almaty qalasynyń oqý oryndarynda mamandar arnaıy dáris oqýda.
Dintanýshy, ál-Farabı atyndaǵy qazaq ulttyq ýnıversıtetiniń professory Qarlyǵash Borbasova búgin «Dımed» Almaty medıtsınalyq kolledjiniń stýdentterimen kezdesti. Maman tek dáris qana oqyp qoıǵan joq. Sondaı-aq, ol stýdentermen suhbattasty. Suraqtaryna jaýap berdi. Dintanýshy eń aldymen destrýktıvti kýltter týraly aıtty.
«Destrýktıvti kýltter degen sóz «búldirgish» degen maǵynany bildiredi. Dinı aǵymdar azamattarymyzdyń quqyǵyn buzady, olarǵa psıhologııalyq ádis-tásilderdi qoldana otyryp, zııanyn tıgizedi. Keıbir destrýktıvti dinı aǵym músheleri otansúıgishtik, ultjandylyq degen qasıetterdi baǵalamaıdy. Memlekettik rámizderdi moıyndamaı, áskerı boryshty joqqa shyǵarady. Tipti, balalarynyń bilim alýyna qarsylyq kórsetetinderi de bar. Destrýktıvtilikti anyqtaıtyn nárseler kóp. Ony sol azamattardyń is-qımylynan birden anyqtaýǵa bolady»,- deıdi Qarlyǵash Borbasova.
Destrýktıvti dinı aǵymdar jastardy torǵa túsirý úshin psıhologııalyq jáne áleýmettik toptasý ádisterin qoldanady.
«Sizder jassyzdar. Jaqsy men jamandy ajyrata bilesizder dep úmittenem. Osyndaı jat aǵymdaǵy adamdardyń arbaýyna túsip qalmas úshin din, ekstremızm, terrorızm, radıkalızm degendi bilý qajet. Biraq, aqparatty áleýmettik jeliden emes, arnaıy mekeme, meshitterden alǵandaryńyz abzal. Teris aǵymdaǵy adamdar sizdiń senimińizge aqyryndap kiredi. Olar eń aldymen sizdiń kıim úlgińizge kóńili tolmaıtynyn aıtady, keıin mamandyqty durys tańdamadyńyz deýi múmkin. Sóıtip, aqyryn-aqyryn memleketti, qoǵamdy jamandaı bastaıdy. Joǵaryda aıtqandaı sizdiń oıyńyzdy psıhologııalyq turǵydan buzady. Sondyqtan, abaı bolyńyzdar»,-dep qosty dintanýshy.
Dáris tyńdaýǵa kelgen stýdentter lektordy uıyp tyńdady. Keıbireýleri sondaı aǵymdaǵy adamdardy baıqap qalsa, qaıda habarlasýǵa bolatynyn surady.
«Men osy medıtsınalyq kolledjdiń 2-kýrs stýdentimin. Biz rasynda jat aǵymdar týraly kóp bile bermeımiz. Bári musylman, «Allanyń quly» dep túsinemiz. Stýdentter úshin dáris uıymdastyrǵan mekemege alǵys aıtamyn. Jastarǵa mundaı dárister qajet dep oılaımyn. Men ózimidi tolǵandyryp júrgen suraqqa tolyqqandy jaýap aldym», - deıdi «Dımed» Almaty medıtsınalyq kolledjiniń stýdenti.
Dáris oqý barysynda din men memleket taqyryby da sóz boldy. Adamnyń rýhanı dúnıesi, ultymyzdyń birligi, búkil qazaqstandyqtardyń túsinistigi men kelisimdi tirligi, eldiń tutastyǵy, táýelsizdigimizdiń tuǵyrly bolýy jaıly da aıtyldy.
Ulttyq ımmýnıtetti kúsheıtýdiń rýhanı arqaýy - dástúrli ıslam dini ekeni anyq.
Foto: baribar.kz