Jat aǵymdaǵylar dindi jamylyp, aram pıǵylyn iske asyryp jatyr - psıholog

ALMATY. QazAqparat – Qazir elimizde destrýktıvti dinı qyzmetten zardap shekkenderge konsýltatsııalyq jáne psıhologııalyq kómek kórsetý, teris joldan shyǵarý úshin túrli jobalar qolǵa alyndy. Arnaıy ońaltý ortalyqtary men karantın lagerleri jumys istep tur. Halyq arasynda arnaıy aqparattyq top túsindirý jumysyn júrgizýde. Olardyń arasynda psıholog Lola Shakımova da bar.

Psıhologtyń sózine júginsek, teris aǵymǵa túsken azamattardyń kópshiligi - orys tildiler. Sonymen qatar, áleýmettik jaǵdaıy tómen adamdar radıkal toptardyń azǵyrýyna jıi tap bolyp, odan shyǵa almaı qalady.

Lola Shakımovanyń aıtýynsha, «Qaýyrt jeli – 114» jumysy óz nátıjesin berýde.

«Mamandar telefon arqyly jáne saıttyń onlaın rejıminde turǵyndardyń dinge qatysty saýaldaryna jaýap berip, destrýktıvti dinı aǵymdardan zardap shekkenderge psıhologııalyq qoldaý kórsetedi. Konsýltatsııalyq keńes qazaq jáne orys tilderinde júredi»,- dedi psıholog.

Psıhologtyń sózine qulaq assaq, «Jýsan» operatsııasynyń kómegimen elge oralǵan azamattar búginde qoǵammen aralasyp, ózderiniń burys jolǵa túskenin túsingen. Psıhıkasy álsirep, ábden qorqyp qalǵan balalar da birtindep qalypqa kelip jatyr.

«Statıstıkaǵa súıensek, jat el asyp ketkenderdiń basym kópshiligi batys aımaqtan. Qazir jat aǵymdaǵylar dindi jamylyp, basqa aram pıǵylyn iske asyryp jatyr. Din - olar úshin aldamshy qural ǵana. Syrt kóz úshin dindi jamylyp, top jınaý úshin, kópshiliktiń kúshimen kózdegen maqsatyna jetý úshin túrli quıtyrqy áreketterge barady. Olardyń arasynda esirtki paıdalanýshylar jáne ony taratýshy toptar da bar ekenin jasyrmaımyz» - deıdi psıholog Lola Shakımova.

Jat aǵymdaǵylarmen kúres aqyryndap jemisin berip jatyr. Qazir halyq aq pen qarany ajyrata alady. Desek te, destrýktıvti kýltter ońaılyqpen berilmeıdi. Sondyqtan ár ata-ana balalaryn baqylaýǵa alýy tıis. Sebebi, jat aǵym qurbandarynyń basym bóligi - jastar. Jastardy radıkaldardyń aram pıǵylynan saqtaý, qutqarý - qoǵam mindeti.