Jasyryn tergeý áreketteri kezinde 227 zańbuzýshylyq anyqtaldy - Bas prokýratýra
Jasyryn tergeý áreketterin júrgizý kezinde azamattardyń konstıtýtsııalyq quqyqtarynyń saqtalýyn qadaǵalaý – prokýratýra organdary qyzmetiniń basym baǵyttarynyń biri.
Ótken jyly tergeý sýdıalarynyń qaraýyna JTÁ ótkizý týraly 34 637 qaýly tústi, onyń ishinde 32 393 qaýly sanktsııalandy, 2 244-inen bas tartyldy.
Sottyń sanktsııa berýden bas tartýynyń sebepteri tergeýshiniń tapsyrmasyn jasaý kezinde tıisti talaptardyń saqtalmaýy, dáleldi negizdemeniń bolmaýy jáne olardy taǵaıyndaý merzimderiniń buzylýy boldy.
Bıylǵy І toqsanda jasyryn tergeý áreketterin taǵaıyndaý jáne júrgizý kezinde zańdylyqtyń jaı-kúıin tekserýmen qylmystyq qýdalaý organdarynyń qyzmetinde zańdylyqtyń buzylýy anyqtaldy. Máselen, prokýrorlar JTÁ taǵaıyndaý tártibin saqtamaýǵa, olardy júrgizýdiń tıisti negizdemeleriniń bolmaýyna, merzimderdi buzýǵa, sondaı-aq JTÁ-niń zańsyz ótkizýge baılanysty kóptegen zań buzýshylyqtardy anyqtady.
QPK 240-babynyń 1-1-bóligine sáıkes ózine qatysty jasyryn tergeý áreketi júrgizilgen adamdy bul týraly qylmystyq is boıynsha qorytyndy sheshim shyǵarylǵan kezden bastap alty aıdan keshiktirilmeıtin merzimde jasyryn tergeý áreketiniń nátıjelerimen tanyspaı, sotqa deıingi tergeý organy habardar etýge tıis. Bul rette ózderine qatysty JTÁ júrgizilgen adam habarlanǵan sátten bastap on bes táýlik ishinde tıisti JTÁ júrgizýdi zańsyz dep taný jáne keltirilgen zalaldy óteý týraly ótinishpen mamandandyrylǵan tergeý sotyna júginýge quqyly. Osyǵan qaramastan, 227 jaǵdaıda QPK-niń kórsetilgen talaptaryn buzý faktileri anyqtaldy. Bas prokýratýra zań buzýshylyqtar boıynsha qylmystyq qýdalaý organdarynyń atyna prokýrorlyq qadaǵalaý aktilerin engizdi.