Jasyl tehnologııalardy ilgeriletý ortalyǵynyń aktsııalary memleketke qaıtaryldy — Úkimet

NUR-SULTAN. QazAqparat – «Halyqaralyq jasyl tehnologııalar jáne ınvestıtsııalyq jobalar ortalyǵy» KEAQ aktsııalary memleket menshigine qaıtaryldy. Qazaqstan Respýblıkasynyń Úkimeti tıisti Qaýly qabyldady, dep habarlaıdy QazAqparat Premer-Mınıstrdiń resmı saıtyna silteme jasap.

«Qazaqstannyń ekologııalyq uıymdarynyń qaýymdastyǵy» zańdy tulǵalar birlestiginiń «Halyqaralyq jasyl tehnologııalar jáne ınvestıtsııalyq jobalar ortalyǵy» kommertsııalyq emes aktsıonerlik qoǵamy aktsııalarynyń jalpy paketiniń 50 (elý) paıyzyn + 1 aktsııasyn syıǵa tartý sharty boıynsha respýblıkalyq menshikke berý týraly usynysy qabyldansyn», - delingen Qaýly mátininde.

Ortalyq 2018 jylǵy sáýirde ekonomıkanyń básekege qabilettiligin, halyqtyń turmys sapasyn arttyrýǵa jáne qorshaǵan ortaǵa teris áserdi tómendetýge baǵyttalǵan OQT (eń ozyq qoljetimdi tehnologııalar) qaǵıdattaryn engizý arqyly jasyl tehnologııalardy ilgeriletý jáne bıznesti qoldaý maqsatynda quryldy.

2018 jylǵy jeltoqsanda 50 paıyz + 1 aktsııa tikeleı ataýly satý arqyly «Qazaqstannyń ekologııalyq uıymdarynyń qaýymdastyǵy» ZTB-ǵa berildi.

Endi «Halyqaralyq jasyl tehnologııalar jáne ınvestıtsııalyq jobalar ortalyǵy» KEAQ aktsııalar paketiniń 100%-y QR Ekologııa, geologııa jáne tabıǵı resýrstar mınıstrliginiń basqarýymen memleket menshiginde bolady.