«Jasyl» tehnologııalar ortalyǵy 2018 jyly jumysyn bastaıdy - QR Energetıka mınıstri

ASTANA. QazAqparat - «Jasyl» tehnologııalar ortalyǵy óz jumysyn 2018 jyly bastaıdy. Bul týraly búgin «Jasyl kópir» seriktestik baǵdarlamasy» halyqaralyq forýmy barysyndaǵy baspasóz máslıhatynda QR Energetıka mınıstri Qanat Bozymbaev málim etti, dep habarlaıdy QazAqparat.

«Qazaqstan dáıekti túrde «jasyl» ekonomıkaǵa aýysý tujyrymdamasyn júzege asyrýda. Osy tujyrymdamany iske asyrýdaǵy qadamdardyń biri - EKSPO pavılondary biriniń bazasynda «Jasyl» tehnologııalar jáne ınvestıtsııalar ortalyǵyn qurýǵa negizdelgen. Ózderińiz bilesizder, ortalyqty BUU-nyń túrli uıymdarynyń qoldaýymen qurý qarastyrylyp otyr. Sonymen qatar biz jeke kapıtaldyń qatysýyn da eskerýdemiz», - dedi Bozymbaev.

Onyń sózine qaraǵanda, ortalyq qyzmetine Ortalyq Azııa óńiri halqy arasynda «jasyl» mádenıetti qalyptastyrý, «jasyl» tehnologııalar transferti, sondaı-aq «jasyl» qarjylandyrý kiredi.

«Jańa jylǵa deıin negizgi qujattarǵa qol qoıyp, kelissózderdi aıaqtaımyz degen oıdamyn. Osy rette aldaǵy jyly ortalyq tolyqqandy qyzmet etýi tıis», - dedi mınıstr.