Jasyl ekonomıkany damytýǵa mańyzdy qadam jasaldy - Ulttyq keńes múshesi
«Búgingi jıynda Prezıdent Úkimetke balamaly energııa túrlerin qoldaý týraly jańa zań ázirleýdi tapsyrdy. Qazaqstanda 2009 jyly qabyldanǵan zań bar. Alaıda, ol sýtegi, kómirtegi gazmetan, turmystyq qatty qaldyqtardy óńdeý sııaqty energııa túrlerin qamtymaıdy. Sondaı-aq, óndiristik gazdar jáne geotermaldyq energııa sııaqty túrleri qalyp qoıady. Sondyqtan, bul tapsyrma ekonomıkany ártaraptandyrý men energotıimdilikti tómendetý aıasynda jasyl ekonomıkany damytýǵa jasalǵan mańyzdy qadam dep sanaımyz», - dedi Arman Qashqynbekov.
Sonymen qatar, ol Memleket basshysy Úkimet otyrysynda Energetıka mınıstrligine Qazaqstan Respýblıkasynyń 2035 jylǵa deıingi energetıkalyq balansyn ázirleýdi tapsyrǵanyn atap ótti.
«Sondaı-aq, Prezıdent Ekologııa mınıstrligine 2021-2025 jyldarǵa arnalǵan «Jasyl Qazaqstan» ulttyq jobasyn ázirleýdi tapsyrdy. Atalǵan joba jasyl tehnologııany, ekologııalyq, energııa únemdeýshi tehnologııalardy qamtý kerektigi aıtyldy. Biz jasyl qaýymdastyq retinde Memleket basshysyna únemi qoldaý kórsetip otyrǵany úshin shyn júrekten alǵys aıtamyz. Ulttyq qoǵamdyq senim keńes platformanyń jumys isteýi óte jaqsy. Bul format ári qaraı da nátıjeli jumys isteıdi dep senemiz», - deıdi ol.
Eske salsaq, Ulttyq keńestiń besinshi otyrysy ótti. Ulttyq qoǵamdyq senim keńesi quramynda rotatsııa jasaldy. Jańartylǵan Májilis quramynda Ulttyq keńestiń 9 múshesi bar. _Ótken jyly 22 qazanda QR Prezıdenti Qasym-Jomart Toqaevtyń qatysýymen Ulttyq qoǵamdyq senim keńesiniń tórtinshi otyrysy, al 2019 jyly 6 qyrkúıekte alǵashqy otyrysy boldy.