«Jastyq shaqtyń qateligi» atty poetıkalyq derekti fılm túsirilip jatyr

ASTANA. QazAqparat - Qazaqstannyń eńbek sińirgen qaıratkeri, belgili dokýmentalıst Baqyt Qaıyrbekov «Jastyq shaqtyń qateligi» atty jańa jobasyna kiristi. Bul - Táńiri men Aspannyń beınesin jańǵyrtý týraly poetıkalyq derekti fılm. Týyndy ulttyq kınony qoldaý memlekettik ortalyǵynyń kómegimen túsirilip jatyr, dep habarlaıdy QazAqparat.

Qazirgi ýaqytta túsirilim toby Almaty oblysynyń Qarasaı aýdanyndaǵy Úshqońyr ústirtinde jumys istep jatyr.

Kartınanyń túsirilimi mamyr aıynan maýsymnyń ortasyna deıin jalǵasady.

Jumystyń birinshi jáne eń qıyn bóligi Iordanııada, áıgili Petra qalasynda ótti.

Kartınanyń prodıýseri Aıgúl Cherendınovanyń aıtýynsha, fılmniń búkil negizgi kórinisteri túsirilip bitti, tek natýra jáne derekti kadrlar, sondaı-aq pavılonda birneshe túsirilim jumystary qaldy.

«Baqyt Ǵafýuly - negizinen qazaq salt-dástúrlerin túsindirý mamany. Bul fılmde ózimiz ben eń kóne shýmer mádenıeti arasyndaǵy jahandyq baılanysty kóremiz. Bul jaıynda Oljas Súleımenov óziniń «Shýmername» kitabynda aıtyp ketken. Rejısser Súleımenovtiń prozalyq shyǵarmashylyǵyn qaıta qarastyryp, salt-dástúr poetıkasyn jetkizýge jáne kórneki beıneler arqyly qazaqtardyń mıfologııalyq sanasyn qaıta jańǵyrtýǵa umtylady», - dep atap ótti prodıýser.

Avtorlar úlken prokatqa shyǵýǵa úmitti, sonymen qatar halyqaralyq kınofestıvalderde týyndylardy ilgeriletýge mamandanǵan kompanııamen yntymaqtastyqty josparlap otyr.

«Bir jaǵynan, bul fılmde ashylǵan taqyryp eń aldymen ózimiz úshin mańyzdy ekeni anyq. Bul - qazaqtyń dúnıetanymy. Bizge ózimizdi taný fılmdi sheteldikterge kórsetýden mańyzdy», - dep qorytyndylady A.Cherendınova.