Jastarmen jumys barysynda vedomstvoaralyq qatynasty kúsheıtý mańyzdy - Dáýren Abaev

NUR-SULTAN. QazAqparat - Jastar saıasatyn tıimdi alǵa jyljytýda vedomstvolyq qarym-qatynasty kúsheıtý mańyzdy. Bul týraly búgin Úkimet otyrysynda Jastar jylyn ótkizý jónindegi jol kartasy týraly baıandaǵan Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Tuńǵysh Prezıdent «el keleshegi jas urpaq tárbıesimen tikeleı baılanysty» degen. Sondyqtan memlekettik jastar saıasatynyń maqsaty - olarǵa tolyqqandy rýhanı, mádenı bilim berý, kásibı jáne fızıkalyq turǵydan jan-jaqty qoldaý bildirý. Jastar saıasatyn tıimdi júzege asyrý úshin vedomstvolyq qarym-qatynasty kúsheıtý mańyzdy. Sondyqtan da ár sala boıynsha sapaly jumys júrgizip, bul baǵytty jan-jaqty damytý qajet», - dedi mınıstr.

Onyń aıtýynsha, jastarmen jumys júrgizý boıynsha qajetti normatıvtik-quqyqtyq, uıymdastyrýshylyq jáne kontseptýaldyq baza birqatar qujatta kórsetilgen. Memlekettik organdardyń jaýapkershiligi «Memlekettik jastar týraly» Zańmen belgilengen. Al strategııalyq baǵyty «2020 bolashaqqa jol» memlekettik jastar saıasaty tuyjyrmdamasynda kórinis tabady. Sondaı-aq jastardyń osal toptarymen, ıaǵnı jumysy joq, eńbek etýge, bilim alýǵa yntalanbaıtyn jastarmen jumys isteýge baǵyttalǵan jol kartasy da bar.

«Sol toptardy eńbekke tartý, jumyspen qamtýdy qarastyryp otyrmyz. Jastarymyzdyń qoǵamdyq sana-sezimin oıatý, jańashyldyqqa umtylýǵa jol ashý úshin rýhanı baǵdarlamasyn iske asyrý boıynsha is-sharalar jospary qabyldandy.

QHA-men tyǵyz qarym-qatynas ornattyq. Maqsatymyz - jastarymyzdy toleranttylyq baǵytynda, shydamdylyq pen joǵary etıka turǵysynda tárbıeleý», - dedi D.Abaev.