Jastarǵa jeńildetilgen tártippen 2,5 paıyz bolatyn nesıe qashan beriledi

ASTANA. QazAqparat - Eńbek jáne halyqty áleýmettik qorǵaý birinshi vıtse-mınıstri Aqmádı Sarbasov elimizdegi jastarǵa 2,5 paıyzben nesıe berý kelesi aıda bastalatynyn aıtty, dep habarlaıdy QazAqparat tilshisi.

«Eńbek mınıstrligi erejeni ázirledi. Tıisti buıryq shyǵyp, Ádilet mınıstrliginde tirkeýden ótti. Bizdiń vedomstvoǵa qatysty sheshim qabyldandy. Qazirgi kezde jergilikti atqarýshy organdarmen birlese osy tetik boıynsha jumys istep jatyrmyz. Osy aıda jergilikti atqarýshy organdar men Qarjy mınıstrligi nesıe kelisimine qol qoıady. Sondyqtan kelesi aıdan bastap berýge múmkindik jasalady», - dedi A. Sarbasov Senatta ótken baspasóz máslıhatynda.

Budan buryn habarlanǵandaı, byltyr qyrkúıektegi Joldaýynda QR Prezıdenti Qasym-Jomart Toqaev jastarǵa jeńildetilgen tártippen jyldyq ósimi 2,5 paıyz bolatyn shaǵyn nesıe beriletinin aıtty.

Atap aıtqanda, jastardy kásipke tartý úshin 6 myń azamatqa 5 jyl merzimge 2,5 paıyzben shaǵyn nesıe beriledi. Eńbek jáne halyqty áleýmettik qorǵaý mınıstri Tamara Dúısenovanyń aıtýynsha, ol nesıeniń somasy 5 mln teńge bolmaq.