Jastarǵa jalǵa beriletin baspana: Elordanyń qaı aýdandarynan páter taratylady

NUR-SULTAN. QazAqparat - Nur-Sultan qalasy ákimdiginiń Turǵyn úı qorynyń dırektory Nursulý Qojahmetova jastarǵa satyp alý quqyǵynsyz, jaldamaly páterler elordanyń qaı aýdandarynan beriletinin aıtty, dep habarlaıdy QazAqparat tilshisi.

«Bizdiń basty sharttarymyz qandaı? Eń aldymen, azamattarǵa yńǵaıly bolý úshin osy baǵdarlamany elektrondy túrde júrgizýdi jón kórdik. Ótinim Smart Astana portaly arqyly elektrondy túrde qabyldanady. Jaldamaly úıden úmitti bolsańyz Smart Astana portalynda ETsQ arqyly onlaın rejimde ótinish jibere alasyz. Ótinish bergennen keıin biz ony óńdeımiz. Óńdeý ýaqyty birneshe kúndi alady. Osydan keıin ótinim berýdegi kemshilikterdi joıý úshin sizge bir kún beremiz. Eger siz tizimde bir nárseni umyt qaldyrsańyz nemese naqty mártebeńizdi, derekterdi naqtylaǵyńyz kelse ár úmitkerge qujattardy tolyqtyrýǵa bir kún beremiz. Sondaı-aq, ol da elektrondy tártipte júrgiziledi», - dedi Nursulý Qojahmetova elordanyń baspasóz ortalyǵynda ótken brıfıngte.

Onyń aıtýynsha, Nur-Sultanda bıyl bıyl bir jáne eki bólmeli 1050 páter beriledi (30-70 sharshy metrge deıin). Qurylys basqarmasynyń málimeti boıynsha, jastarǵa 202 eki bólmeli jáne 848 bir bólmeli páter tapsyrylady.

«Qatysýshylardan mynany eskerýdi suraımyn: ár otbasynyń quramy ár túrli, sondyqtan mártebesi de árqalaı bolmaq. Kópbalaly bolsańyz da, úsh bólmeli páterdiń berilmeıtinin, tek bir jáne eki bólmeliler taratylatyny eskerý kerek. Turǵyn úı satyp alý, uzartý quqyǵynsyz bes jylǵa beriledi. ıAǵnı, bes jyldan keıin biz sizden osy turǵyn úıdi bosatýdy suraýǵa májbúr bolamyz, óıtkeni biz bul páterlerdi basqa jastarǵa beremiz. Baspanalardyń jaldaıtyn aqysy aıyna 5-ten 15 myń teńgege deıin bolady. Bári de úıdiń sharshy metrine baılanysty. Biz daıyn tizimdi osy jyldyń 10 jeltoqsanynan keshiktirmeı ornalastyramyz. Baspanalar jeltoqsan aıynda berile bastaıdy», - dedi ol.

Nursulý Qojahmetovanyń aıtýyna qaraǵanda, baspanalar Sh.Ýálıhanov-S.Seıfýllın kóshesiniń qıylysynda («Artem» SO mańaıy), Bógenbaı batyr men Á.Jangeldın kóshelerinen beriledi. Bir bólmeli páter aýdany 30-45 sharshy metr bolsa, eki bólmeli 46-70 sharshy metr aralyǵynda. Bári de – jańa páterler.

«Zań boıynsha biz aıaqtalmaǵan úıdi bere almaımyz. Jıhazdy jastardy ózderi satyp alýy kerek», - dedi ol.

Aıta ketsek, 5-10 qarasha aralyǵynda elordada jumys isteıtin jastardan satyp alý quqyǵynsyz jaldamaly páter boıynsha ótinish qabyldanady.