Jastarǵa jaldamaly páterdi satyp alý quqyǵy berile me

<p>Elimizdiń 5 óńirinde jastarǵa 5 paıyzben nesıelik turǵyn úı berý baǵdarlamasy ázirlenip jatyr. Bul týraly Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Jastarǵa 5 paıyzdyq nesıelik turǵyn úı berý boıynsha óńirlik baǵdarlamalar bar. Atap aıtqanda, Almaty jáne Astana qalalarynda, sondaı-aq Qaraǵandy, Jambyl, Qostanaı, Atyraý, Almaty, Aqtóbe, Ulytaý, Jetisý jáne Abaı oblystarynda jastar baǵdarlamalary iske asyrylýda. Osy baǵdarlamalarǵa 2017-2022 jyldary aralyǵynda Otbasy bankine jergilikti bıýdjetterden 65,2 mlrd teńge bólinip, atalǵan qarajat esebinen bank 5 myńǵa jýyq ótinimdi maquldady», - dedi Úkimet basshysynyń birinshi orynbasary jaýabynda.

Onyń atap ótýinshe, osy jyly bul baǵdarlamalar boıynsha shamamen 39 mlrd teńge qarastyrylǵan.

«Osyndaı baǵdarlamalar basqa óńirlerde de (Pavlodar, Túrkistan, Soltústik Qazaqstan, Qyzylorda oblystary men Shymkent qalasynda) ázirlenýde. Osylaısha, qoldanystaǵy tetikter boıynsha jastardyń basym kópshiligine memlekettik qoldaý kórsetý maqsatynda, sondaı-aq turǵyn úımen qamtamasyz etý máselesinde halyqtyń áleýmettik osal toptarynyń basymdyǵyn eskere otyryp, qazirgi ýaqytta jastarǵa jaldamaly páterlerin satyp alý quqyǵyn berý merziminen buryn dep paıymdaımyz», - dedi Roman Sklıar.