Jastarǵa shyǵarmashylyq shabyt berý kerek - Juldyz Omarbekova
«Prezıdent Qasym-Jomart Toqaev árbir sózinde jáne saılaýaldy baǵdarlamasynda jastarǵa kóp kóńil bólingenin aıtyp júr. Ol alda kele jatqan reformalardyń lokomotıvi jastar ekenin aıtty. Jalpy, Qazaqstanda jastarǵa jaǵdaı jasalǵan. Bizdiń baǵdarlamalar - «Serpin», «Jasyl el», «Dıplommen aýylǵa» baǵdarlamalarynyń bári de jemisin berip jatyr. Biraq, bir másele bar - jastar ony sezinbeıdi», - dedi Juldyz Omarbekova Qazaqstan strategııalyq zertteýler ınstıtýty uıymdastyrǵan «Prezıdent Q.K.Toqaevtyń 10 mindeti: el damýynyń jańa deńgeıi» atty dóńgelek ústelde.
Vıtse-mınıstrdiń aıtýyna qaraǵanda, óńir-óńirler jastardy qoldaýǵa qatysty maqtanarlyq statıstıkany keltirip jatady.
«Alaıda, jastar muny sezinbeıdi. Nelikten? Bizdiń memlekette ózge elderden góri keremet jobalar júzege asyrylyp jatyr. Josparlar men zańdarda min joq. Biraq, jastar osyny sezinbeı jatsa, qaı jerden aqaý ketti? Másele - uıymdastyrýda, atalǵan sharalardyń, baǵdarlamalardyń júzege asyrylýynyń tıimdiliginde, baqylaýda. Jastarǵa ne kerek? Atam zamannan beri jastardyń qalaıtyny - ádilettilik. Shyndyqty izdeýshiler de solar. Qasym-Jomart Toqaevtyń eń basty artyqshylyǵy - «aýrýyn jasyrǵan ólediniń» maǵynasyn aıqyn túsinip, túısinip otyr. Sol sebepti, qoǵamnyń máselelerin ashyq aıtyp, bastysy - túzeı bilýimiz kerek sekildi», - deıdi vıtse-mınıstr.
Juldyz Omarbekova Aqparat jáne qoǵamdyq damý mınıstrliginiń quziretine din jáne jastar, ÚEU-men jumysty retteý máseleleri enip otyrǵanyn atap ótti.
«Qazaqstandaǵy 4 mln jas memleket ne berip, ne usynyp otyrǵanyn bilýi úshin ne isteý kerek? Mınıstr Dáýren Abaevpen, vedomstvonyń mamandarymen osy máseleni keńinen talqylap jatyrmyz. Jastar baıaǵyda-aq áleýmettik jelige ketip qalǵan. Bári tez ózgerip jatyr. Osy baǵyttaǵy jumysty jetildirip, jastardyń talabyna saı kelý jaǵyn oılastyryp jatyrmyz. Qasym-Jomart Toqaev jastardy iske tartý kerektigin aıtyp otyr. Ol úshin ádiletti túrde olarǵa múmkindik berip, ózderi qalaıtyn shyǵarmashylyǵyna shabyt berý kerek», - deıdi ol.
Eske sala ketsek, Qasym-Jomart Toqaev Prezıdent qyzmetine resmı kirisý rásiminde memleketti damytý jolynda 10 baǵytqa basa mán berý kerektigin málim etken edi.