Jastarǵa saıası tájirıbe jınaýyna jaǵdaı jasalady – Álı Bektaev

NUR-SULTAN. QazAqparat – «Aýyl» partııasynyń tóraǵasy, Senat depýtaty Álı Bektaev Ulttyq qoǵamdyq senim keńesiniń otyrysyndaǵy Prezıdenttiń bastamalaryn tolyq qoldaıtynyn aıtty, dep habarlaıdy QazAqparat tilshisi.

«Prezıdenttiń Ulttyq keńestiń ekinshi otyrysynda kótergen birqatar mańyzdy máseleleriniń ishinde negizgileriniń birnesheýine toqtalǵym kelip tur. Sebebi tikeleı bizdiń qyzmetimizge nemese qoǵamdyq jumysymyzǵa qatysty birneshe máselelerdi ózimizge jaqyn sanap otyrmyz. Onyń biri – saıası partııalarǵa qatysty máseleler. Saıası reformany júrgizý úshin saılaý zańyna qatysty ózgerister, saıası partııalarǵa baılanysty zańǵa ózgerister engizýdiń kún tártibinde turǵandyǵy ras, ıaǵnı kópten beri aıtylyp kele jatyr. Memleket basshysy da halyqqa arnaǵan Joldaýynda osyǵan toqtalyp ketken bolatyn. Sondyqtan Ulttyq qoǵamdyq senim keńesinde osyǵan qatysty naqty usynystar aıtyldy jáne ony biz tolyq qoldap otyrmyz», - dedi senator.

Osy oraıda Á. Bektaev partııany quryp, ony tirkeýden ótkizýge kórsetilip otyrǵan jeńildikterdiń mańyzdylyǵyn atap ótti.

«Eger buryn partııany qurý úshin 40 myńnan astam músheni jınaý kerek bolsa, qazir sonyń normatıvtik kórsetkishi, ıaǵnı shekti deńgeıi 20 myń adamǵa deıin tómendetilmek. Bul óz kezeginde partııany qurý men ony tirkeýden ótkizýge birneshe ese múmkindik joǵarylap otyrǵandyǵyn ańǵartady. Ekinshiden, osy tirkeýdiń tetikteri ońtaılanýda. Atap aıtqanda, aldaǵy ýaqytta partııalardyń sany kóbeıse, partııalardyń arasyndaǵy básekelistikti arttyrady dep oılaımyn. Al básekelestik jumysty jandandyrýǵa múmkindik beredi. Biz «Aýyl» partııasynyń ókili retinde osy qadamdardy durys dep esepteımiz. Sondyqtan bul baǵyttaǵy sharalarǵa biz daıynbyz», - dedi Álı Bektaev.

Sonymen qosa, depýtat partııalyq saılaý tizimderinde áıelder men jastar úshin mindetti 30 paıyzdyq kvotany qarastyrý usynysy óte oryndy ekenin tilge tıek etti.

«Jastarǵa áleýmettik lıfti ǵana emes, saıası-qoǵamdyq lıftilerdi usyný – kún tártibinen túspegen másele. Jastarǵa saıası tájirıbe jınaqtaýǵa múmkindik berýimiz kerek», - dedi ol.

Budan buryn habarlanǵandaı, Ulttyq qoǵamdyq senim keńesiniń 2-otyrysynda QR Prezıdenti Qasym-Jomart Toqaev parlamenttik oppozıtsııa ınstıtýty qajet ekenin atap ótti.