Jastarǵa óz densaýlyǵyn qorǵaýǵa kómektesetin arnaıy mobıldi qosymsha iske qosylady

NUR-SULTAN. QazAqparat – QR Densaýlyq saqtaý mınıstrligi men BUU Turǵyn halyq salasyndaǵy (ıÝNFPA) qory jasóspirimder men olardyń ata-analary úshin reprodýktıvti densaýlyq týraly aqparat beretin baılanys paketin iske qosty, dep habarlaıdy QazAqparat tilshisi.

Osylaısha, arnaıy veb-saıt, mobıldi qosymsha jáne Telegram kanalyndaǵy chat-bot iske qosylady. Bul quraldar Úkimet qoldaýymen jastardyń densaýlyǵy men ál-aýqatyna ınvestıtsııa salýdy jalǵastyrý maqsatynda jasalǵan. Atalmysh joba ulttyq strategııalarda kórsetilgen, sonymen qatar Naırobı sammıtinde jarııalanǵan jastarǵa qyzmet kórsetý júıesin nyǵaıtý jáne ınstıtýttandyrý qadamdarynyń biri sanalady.

Baılanys ónimderinen basqa, jastarǵa kórsetiletin qyzmetterdi kúsheıtý maqsatynda turaqty damý strategııasyn ázirleýmen qatar eldegi Jastar densaýlyq ortalyqtaryn (JDO) qarjylandyrý kózdelip otyr.

«Jastar densaýlyq ortalyǵy kámeletke tolmaǵandarǵa medıtsınalyq-psıhologııalyq kómek kórsetetin densaýlyq saqtaý sýbektilerine aınalady Olardyń basty maqsaty – jasóspirimder men jastar arasynda salaýatty ómir saltyn nasıhattaý jáne reprodýktıvti densaýlyqty qorǵaý, onyń ishinde erte jynystyq belsendiliktiń aldyn alý, kontratseptıvterdi qoldaný, erte júktiliktiń aldyn-alý, otbasyn josparlaý jáne jynystyq jolmen beriletin ınfektsııalar týraly aqparattandyrý», - dedi densaýlyq saqtaý vıtse-mınıstri Ajar Ǵınııat.

Densaýlyq saqtaý mınıstrligi ıÝNFPA-nyń qoldaýymen ótkizgen zertteýi kórsetkendeı, 15-19 jas aralyǵyndaǵy jasóspirimderdiń 30%-y jynystyq qatynasta, biraq kópshiligi kontratseptsııany paıdalanbaıdy. Al basym kópshiliginiń (90%) AQTQ jáne JQTB týraly jan-jaqty bilimi joq.

Taǵy bir zertteýde jastar men olardyń ata-analary jynystyq jáne reprodýktıvti densaýlyq salasynda kóbirek aqparat qajet ekendigi týraly habarlaǵan. Sonymen qatar bul salada naqty aqparat alýda qıyndyqtar bar ekenin jetkizgen.

«Jastardyń jynystyq jáne reprodýktıvti densaýlyǵyna ınvestıtsııa salý, sonymen qatar olardyń óz densaýlyǵy týraly sanaly sheshimder qabyldaý, óz quqyqtaryn túsindirý, jynystyq qolsuǵýshylyqtan bas tartý quqyǵy, konsýltatsııa alý quqyǵy, AITV-ny qosa alǵanda, jynystyq jolmen beriletin ınfektsııalardyń aldyn alý jáne emdeý quqyqtary men múmkindikterin keńeıtýdi bildiredi. Búgin shyǵarylǵan kommýnıkatsııalyq ónimder jastarǵa óz densaýlyǵyn qalaı qorǵaýǵa jáne sanaly sheshim qabyldaýǵa múmkindik beretin taǵy bir qadam bolar dep úmittenemiz», - dedi BUU-nyń halyqty qonystandyrý salasyndaǵy qorynyń Qazaqstandaǵy ókili (ıÝNFPA), Qyrǵyzstan men Túrikmenstan úshin eldik dırektory Djýlııa Valeze.

«Shyn» dep atalatyn veb-saıt, mobıldi qosymsha jáne Telegram kanalyndaǵy chat-bot Qazaqstandaǵy ıÝNFPA-nyń tehnıkalyq qoldaýymen jáne atalmysh uıymnyń Nıý-Iorktegi páteriniń kómegimen, sondaı-aq ulttyq sarapshylar tobymen birlese jasalǵan. Veb-saıt, mobıldi qosymsha jáne Telegram kanaldaǵy chat-bot qazaq jáne orys tilderinde qyzmet kórsetedi.

Baılanys ónimderine qalaı qol jetkizýge bolady:

Veb-saıt - https://shyn.kz/

Telegram kanalyndaǵy chatbot - @shynkzbot

«SShyn.kz� mobıldi qosymshasyn PlayMarket-ten júkteı alasyz.